კოლეგებო, ჩვენი პროფესია საფრთხეშია! უნდა დავიწყოთ დიდი ბრძოლა, - ასე მიმართავს ადვოკატთა ასოციაციის თავმჯდომარე ზაზა ხატიაშვილი კოლეგებს. მიმართვაში ხატიაშვილი აღნიშნავს, რომ ადვოკატების დევნამ შეუქცევადი ხასიათი მიიღო
”პატივცემულო კოლეგებო, ადვოკატების დევნამ მიიღო შეუქცევადი ხასიათი, დღე არ გავა, ადვოკატს არ მიაყენონ შეურაცხყოფა. რამოდენიმე წუთის წინ დამირეკა ქობულეთში მოღვაწე ადვოკატმა მერი ცინარიძემ, რომელიც ბრძანდება სამი შვილის დედა, ქალბატონ ადვოკატს გამომძიებელმა ირაკლი შაქარიშვილმა მიაყენა შეურაცხყოფა. მიუხედავად იმისა , რომ ადვოკატმა დარეკა გენერალურ ინსპექციაში ყურადღება არავიან არ მიაქცია. დღეს, ადვოკატთა ასოციაციაში მობრძანდა ადვოკატი დიანა მარტიაშვილი ასევე სამი შვილის და სამი შვილიშვილის დედა. ქალბატონ დიანას განცხადებით, მას მიაყენა შეურაცხყოფა ძველი თბილისის პოლიციის განყოფილებაში პოლიციის უფროსმა მამუკა მარუაშვილმა და ინსპექტორმა გელა მარახველიძემ. საქართველოს ადვოკატთა ასოციაცის თავმჯდომარე გადავედი ადვოკატთა უფლებათა დაცვის ბრძოლის რეჟიმში, რასაც უნდა მოჰყვეს დიდი საპროტესტო აქციები, სხვანაირად ხელისუფლებას არ უნდა შეიგნოს, როგორ უნდა მოექცეს ადვოკატს. ამ კვირაში ქუთაისიდან დავიწყებ შეხვედრებს ჩვენს კოლეგებთან მთელი საქართველოს მაშტაბით, რათა ადვოკატებმა გადავწყვიტთ საპროტესტო აქციების ფორმა. ჩვენ უნდა ვაჩვენოთ ხელისუფლებას როგორ უნდა მოეპყრონ ადვოკატს. ჩვენს რიგებში არიან ადვოკატები (სულ ერთი პროცენტი საერთო რაოდენობიდან ) რომლებსაც ხელისუფელბა დაგვიპირისპირებს, მაგრამ ჩვენ ვართ აბსოლუტური უმრავლესობა და უნდა ვიბრძოლოთ ჩვენი პროფესიის გაძლიერებისკენ. ვინც არ გამომყვება ადვოკატთა ასოციაციის თავმჯდომარეს, მაშინ თხოვნა მექნება ხელს ნუ შემიშლიან. კოლეგებო, ძალა ერთობაშია”, - ნათქვამია მიმართვაში.
