კახეთის რაიონის სოფელ ველისციხეში მდგომარეობა სტაბილურია. ჭერემის წყალსაცავში წყლის დონემ 15 სანტიმეტრით დაიწია. ამის შესახებ სააგენტო "ჯი-ეიჩ-ენს" კახეთის გუბერნატორის პირველმა მოადგილემ გიორგი სიბაშვილმა განუცხადა.
სააგენტოსთან საუბარში სიბაშვილმა ასევე აღნიშნა, რომ ველისციხეში არსებულ მდგომარეობასთან დაკავშირებით ოფიციალური განცხადება დაახლოებით ერთ საათში გაკეთდება.
"მდგომარეობა სტაბილურია. ოპერატიული საგანგებო სამუშაოები ამჟამადაც უწყვეტად მიმდინარეობს. წყალსაცავში წყლის დონემ 15 სანტიმეტრით დაიწია, რაც სტაბილურობას განაპირობებს და უკეთესის იმედს იძლევა", _ განაცხადა სიბაშვილმა "ჯი-ეიჩ-ენთან" საუბარში.
ხოლო, რაც შეეხება მოსახლეობას, კახეთის გუბარნატორის პირველი მოადგილის თქმით ამ დროისთვის მათ საშიშროება არ ემუქრებათ. სიბაშვილი ასევე აცხადებს, რომ სავარაუდოდ, მოსახლეობა თავიანთ სახლებს უახლოეს დღეებში დაუბრუნდება.
