ე. წ. ,,ისლამური სახელმწიფოს” მებრძოლებმა სირიის ქალაქ პალმირაში მდებარე რომაულ ამფითეატრში ოცამდე ადამიანი დახოცეს. ამის შესახებ სირიის ოპოზიციის აქტივისტები იუწყებიან.
ლონდონში განთავსებული სირიის ადამიანის უფლებათა დაცვის მონიტორინგის ცენტრში აცხადებენ, რომ სისხლიანი ანგარიშსწორება ტერორისტებმა იმ ადგილობრივი მცხოვრებლების თვალწინ მოაწყვეს, რომლებიც ამფითეატრში ძალის გამოყენებით შეყარეს.
ქალაქ პალმირას აღების დღიდან, უფლებადამცველთა მონაცემებით, რადიკალმა ისლამისტებმა ქალაქში 250 ადამიანი დახოცეს.
ტერორისტებმა პალმირას ნაწილი 16 მაისს ჩაიგდეს ხელში, ხოლო მთლიან ქალაქზე კონტროლი 20 მაისს დაამყარეს.
,,ისლამური სახელმწიფოს” მიერ პალმირაზე მიტანილი შტურმის დროს დაახლოებით 300 სირიელი ჯარისკაცი დაიღუპა.
შეგახსენებთ, რომ ქალაქი პალმირა ცნობილია უძველესი ისტორიული და კულტურული მემკვიდრეობის ძეგლებითა და ღირსშესანიშნაობებით, რომელთაგან, თითქმის, ყველა იუნესკო-ს სიაშია შეტანილი.
