ოკუპირებული აფხაზეთის ჯანდაცვის მინისტრმა ანძორ გოოვმა დღეს სოხუმში მოსკოვის რეპროდუქტოლოგიური კლინიკა ,,ალტრავიტას” წარმომადგენლები მიიღო.
როგორც კლინიკის გენერალური დირექტორის მოადგილემ ირინა კაიმაკანოვამ განაცხადა, ოკუპირებული აფხაზეთისა და რუსეთის ჯანდაცვის სამინისტროებს შორის თანამშრომლობის შესახებ დადებული ხელშეკრულების ფარგლებში, ,,ალტრავიტას” სპეციალისტები აფხაზი ექიმებისთვის თემატური ლექციების ციკლს წაიკითხავენ.
,,ჩვენს მიერ მომზადებული მასალები ფუნდამენტურად ეხება იმ დაავადებებს, რაც უნაყოფობასთან არის დაკავშირებული. მასალების მიხედვით შეიძლება შევარჩიოთ პაციენტები, გამოვიკვლიოთ ისინი და ხელოვნური განაყოფიერებისთვის მოვამზადოთ.” - აღნიშნა კაიმაკანოვამ.
მისი თქმით, სათანადო მომზადების შემდეგ, ხელოვნური განაყოფიერების პროგრამას პაციენტები უკვე მოსკოვში, კლინიკა ,,ალტრავიტა” - ში გაივლიან.
რაც შეეხება ფინანსურ მხარეს, ყველა ხარჯს აფხაზური მხარე აანაზღაურებს.
,,ყველა პაციენტმა, რომელიც მოვა და გაივლის ამ გამოკვლევებს, უნდა იცოდეს, რომ მის ნაცვლად ხარჯებს ჩვენ გადავიხდით.
ჩვენ ვეხმარებით იმ მოქალაქეებს, რომლებსაც სამკურნალოდ აფხაზეთის ფარგლებს გარეთ უწევთ წასვლა.” - განაცხადა ანძორ გოოვმა.
