ჟურნალისტი ირაკლი კორძაია ბიზნესმენ ბესო ხარძიანის გარდაცვალებასთან დაკავშირებით, ახალ დეტალებზე საუბრობს. ტელეკომპანია „მაესტროს“ ეთერში იგი ბერლინიდან ჩაერთო და განაცხადა, რომ

ქვეყნიდან წასვლა იმ მოვლენებიდან გამომდინარე გადაწყვიტა, რასაც საქართველოში, ბოლო ორი თვის განმავლობაში ჰქონდა ადგილი.

მისი თქმით, ხარძიანის მკვლეოლობის შემდეგ, მასზე ხორციელდება სხვადასხვა სახის ზეწოლა.

„ერთ-ერთს ადგილი ჰქონდა ხარძიანის მკვლელობიდან ორი დღის შემდეგ. ამ ყველაფერში ბუნებრივია, ჩართულია უშუალოდ გიორგი უდესიანი, პრემიერ-მინისტრის ნათესაობა, პროკურატურა და ყველა ის მანქანები, რაც მათ ხელთ გააჩნიათ. კონკრეტიკისგან დღეს თავს შევიკავებ, თუმცა გპირდებით, რომ უახლოეს დღეებში ყველაფერს დეტალუარდ გიამბობთ“, - აღნიშნა ჟურნალისტმა. 

მისივე ინფორმაციით, ხელისუფლება ყველაფერს აკეთებს ამ მკვლელობის მივიწყებისთვის და მიმდინარეობს მხოლოდ ამ საკითხის მარგინალიზაცია.
,,საქმე არ არის გამოძიებული და რაღაცნაირად ამ საკითხის მარგინალიზაცია ხდება. ამასობაში, გიორგი უდესიანი გმირი ხდება. ხელისუფლება და პირველ რიგში, პროკურატურა აკეთებს ყველაფერს იმისთვის, რომ საზოგადოებამ ეს თემა მიივიწყოს“, - განაცხადა ირაკლი კორძაიამ. 
რაც შეეხება ზეწოლის კონკრეტულ ეპიზოდს, კორძაიას ინფორმაციით, ხარძიანის მკვლელობიდან მეორე დღეს ერთ-ერთმა მაღალჩინოსანმა დაურეკა და შეხვედრა სთხოვა. აღნიშნულ შეხვედრას ასევე, ერთ-ერთი დეპუტატი ესწრებოდა. 
„ეს შეხვედრა ბელისნკის ქუჩაზე, კაფე „რუმსში“ შედგა. ჩვეულებრივ გვამის გაყიდვას მთავაზობდნენ სიჩუმის სანაცვლოდ. საუბარი იყო ალბათ რაღაც ფულად ჯილდოზე. ეს იყო პირველი ეპიზოდი, რომელიც განსაკუთრებით მტკივნეული იყო ჩემთვის, იმიტომ, რომ ერთ-ერთ ადამიანთან პირადი ახლობლობა მაკავშირებდა“, - განაცხადა კორძაიამ. 
მისივე თქმით, საუბარი ნახევარი საათის განმავლობაში მიმდინარეობდა, რომლის არსიც „ვაჭრობა“ იყო. 
„არსი იყო ჩვეულებრივი ვაჭრობა, რომ მე უნდა გამეყიდა ბესო ხარძიანის გვამი, სიჩუმის სანაცვლოდ. ვისგან მოდიოდა ეს შემოთავაზება, ძნელი მისახვედრი არ არის, რადგანაც ბრალდებებს უშუალოდ ბესო ხარძიანის მთავარ მტერს და იმ ადამიანებს ვუყენებდი, რომლებიც უშუალოდ გიორგი უდესიანს მფარველობდნენ. ეს ადამიანები პრემიერ-მინისტრი და მისი ნათესავები არიან“, - განმარტა ირაკლი კორძაიამ. 
ჟურნალისტი უახლოეს მომავალში სამშობლოში დაბრუნებას აპირებს, თუმცა აქვე აცხადებს, რომ სამშობლოში დასაბრუნებლად და გადაწყვეტილების მისაღებად გარკვეული დრო დასჭირდება. 

„ვატყობ, საზოგადოების მხრიდან გარკვეული მხარდაჭერაა. ის, რომ დღეს ბერლინში ვიმყოფები არ ნიშნავს იმას, რომ ამაზე საუბარი და ამ ყველაფერთან ბრძოლა გავწყვიტე. პირიქით, არც მაქვს გადაწყვეტილი აქ დარჩენა. ნუ გაუხარდებათ, რომ ქვეყნიდან გავიქეცი. მათ სერიოზულ დისკომფორტს ვპირდები მომავალში“, - განაცხადა ირაკლი კორძაიამ და დასძინა, რომ პოლიტიკური დევნილის სტატუსის მოთხოვნას არ აპირებს.

ბიზნესმენ ბესარიონ ხარძიანს მიმდინარე წლის 28 მარტს ესროლეს. ის რესპუბლიკურ საავადმყოფოში გარდაიცვალა. ხარძიანის ოჯახის ახლობლები აცხადებდნენ, რომ მკვლელობის კვალი შესაძლოა, ყოფილი ხელისუფლების წარმომადგენელ გიორგი უდესიანთან მიდიოდეს, რომელთანაც ხარძიანს დავა ჰქონდა.