სასჯელაღსრულების მინისტრის მოადგილემ კახი კახიშვილმა ადამიანის უფლებათა დაცვის კომიტეტის სხდომაზე, პატიმართა მხრიდან საჩივრების მატებაზე ისაუბრა და განაცხადა, რომ უკმაყოფილება გამოწვეულია ძირითადად იმით, რომ პატიმრებს დახურული ტიპის დაწესებულებიდან ღია ტიპის დაწესებულებაში სურთ გადასვლა.
„საიდან არის, უფრო მეტი საჩივარი სახალხო დამცველის ოფისში შემოსული? - ბათუმიდან, ქუთაისიდან, მერვე დაწესებულებიდან და მეშვიდედან. რატომ? - იქიდან ცდილობენ ღია ტიპის დაწესებულებაში გადასვლას და ამიტომ არის საჩივრების რაოდენობა გაზრდილი.
მათ სარეჟიმო პირობებთან შეგუება არ უნდათ, რომელიც არის. პრინციპული პოზიციაა, რომ სარეჟიმო პირობები იქნება მიღწეული. თუკი ადამიანს ბათუმის მერვე საპყრობილეში შეასახლებენ და თუკი ის დაწერს, რომ მის მიმართ არის სავარაუდო წამება, მეც დავწერო რომ თქვენ მაწამებთ, მეც სავარაუდო მსხვერპლი ვიქნები, იმის მიუხედავად, რა პასუხს გამოიტანს პროკურატურა. სავარაუდო წამების განხორციელების შემთხვევაში, გადაყვანა რომ განვახორციელოთ, სერიოზული პრობლემები შეგვემნება და ეს სისტემის კოლაფსს გამოიწვევს“, - განაცხადა მინისტრის მოადგილემ.
მისივე ინფორმაციით, განცხადებებს დღეს კანონიერი ქურდებიც წერენ და ისინი რეფორმას ატარებენ.
„მეუბნებით, 2007 წელთან შედარებით არასათანადო მოპყრობაზე საჩივრების რაოდენობა გაიზარდაო და გახსოვთ, მაშინ, რამდენი საჩივარი იყო? - ნული, იმიტომ კი არა, რომ არავის აწამებდნენ, არამედ იმიტომ, რომ მათ განცხადებებს არ აწერინებდნენ”, - დასძინა კახიშვილმა.
