კულტურისა და ძეგლთა დაცვის ყოფილი მინისტრი ნიკა რურუა ,,ეროვნულ-დემოკრატიული ინსტიტუტის” მიერ გამოქვეყნებული კვლევის შედეგებს, სოციალურ ქსელში ეხმიანება და აცხადებს, რომ მოხდა ტერიტორიული მთლიანობის იდეის შეგნებული გაუფასურება, ისევე როგორც ეკონომიკის ნგრევა.
,,ის ფაქტი, რომ ტერიტორიული მთლიანობა ხალხის ერთი ნაწილისთვის ნაკლებად მნიშვნელოვანი გახდა, ვიდრე სოციალურ/ეკონომიკური პრობლემები, "ოცნების" მავნებლური და წარუმატებელი პოლიტიკის ბრალია, როგორც ტერიტორიული მთლიანობის აღდგენისკენ მიმართულ ქმედებებში, ისე ეკონომიკის საკითხებში - მოხდა მთლიანობის იდეის შეგნებული გაუფასურება, ისევე როგორც ეკონომიკის ნგრევა”, _აცხადებს რურუა.
ეროვნულ დემოკრატიული ინსტიტუტის ბოლო კვლევის თანახმად, გამოკითხულთა უმრავლესობისთვის ყველაზე მნიშვნელოვანი ეროვნული საკითხები სამუშაო ადგილები (66%), ინფლაცია (43%) და სიღარიბეა (39%). გამოკითხულებს მაქსიმუმ სამი პასუხის დასახელებს შეეძლოთ.
ყველაზე მნიშვნელოვან ეროვნულ საკითხებს შორის მეოთხე ადგილს იკავებს ტერიტორიული მთლიანობა (27%), რასაც პენსიები (21%) და ხელფასები (17%) მოსდევს.
ყველაზე ნაკლებად მნიშვნელოვან ეროვნულ საკითხად გამოკითხულებს უმცირესობის უფლებები (0%), მედიის თავისუფლება (0%) და ციხეები (0%) მიაჩნიათ.
ამერიკის ეროვნულ-დემოკრატიულმა ინსტიტუტმა საველე სამუშაოები 27 მარტი-19 აპრილის შუალედში ჩაატარა. NDI-მ ქვეყნის მასშტაბით 4360 ადამიანი გამოკითხა. საშუალო ცდომილების ზღვარი არის 2.3%.
