დედაქალაქის მუნიციპალიტეტის საკრებულოს ფრაქცია „ქართული ოცნება-დემოკრატიული საქართველოსთვის“ თავმჯდომარემ, ჩუღურეთის რაიონის მაჟორიტარმა დეპუტატმა, რიმა ბერაძემ, რაიონის გამგებლის მოადგილესთან, ლადო გოქსაძესთან ერთად, სამაჟორიტარო ოლქში კომპაქტურად ჩასახლებული დევნილების საცხოვრებელ კორპუსებში მიმდინარე სარეაბილიტაციო სამუშაოები ადგილზე დაათვალიერა.
დეპუტატის განცხადებით, სააკაძის N19-ში, სადაც სულ 364 ადამიანი ბინადრობს, უმძიმესი მდგომარეობა იყო. წლების წინ, ორ ერთმანეთაზე მიდგულ კორპუსს შორის გაჩნდა ბზარი, რის შედეგადაც, მოსახლეობას უამინდობის დროს, სახლში წყალი და ნიაღვარი უვარდებოდა.
„2014 წლის 6 დეკემბერს, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს წარმომადგენლებთან და ჩუღურეთის რაიონის გამგებელთან, ზურაბ ჩიკვილაძესთან ერთად შევხვდი დევნილებს და მათ აღნიშნული პრობლემის მოგვარებას დავპირდი. დღეს აქ უკვე მიმდინარეობს მუშა პროცესი. დაახლოებით ერთი კვირის ფარგლებში, სამხარაულის სახელობის ექსპერტიზის ბიურო მოგვაწვდის დასკვნას, რომლის საფუძველზეც კომისიური წესის მიხედვით, ერთობლივად გადავწყვეტთ, შენობას გამაგრებითი სამუშაოები ჩაუტარდება, თუ უფრო რადიკალური ზომების მიღება იქნება საჭირო“, - განაცხადა რიმა ბერაძემ. დეპუტატმა დღესვე ნინოშვილის, ქვლივიძისა და მარუაშვილის ქუჩებზე მიმდინარე აღდგენითი სამუშაობი დაათვალიერა, სადაც სანიაღვრე არხების, წყალსაკანალიზაციო სისტემისა და სხვა ინფრასტრუქტურული პრობლემების გადაჭრის მიზნით სამუშაოები მიმდინარეობს.
