ამერიკელი სენატორი ჯონ მაკეინი აცხადებს, რომ დასავლეთი მოვალეა, უკრაინას იარაღი მისცეს. ამის შესახებ მან ტელეარხ CBS-ის ეთერში საუბრისას განაცხადა.
,,უკრაინელები არ ითხოვენ, რომ მათ მიწაზე ,,ამერიკული ჩექმა” ჩავიდეს, ისინი ითხოვენ იარაღს, რათა თავი დაიცვან. მათ ხოცავენ, მათ ჯარებს ანადგურებენ. ეს სირცხვილია.
მე მრცხვენია ჩემი ქვენის და ჩემი პრეზიდენტის გამო, მე მრცხვენია საკუთარი თავის გამოც, რადგან მათი დახმარება არ შემიძლია.” - განაცხადა რესპუბლიკელმა სენატორმა.
ის უკრაინისთვის იარაღის მიწოდების კატეგორიული მომხრეა.
,,აღმოსავლეთ უკრაინაში არიან ტანკები, რომელთა წინააღმდეგაც უკრაინელებს არავითარი იარაღი არა აქვთ. იქ რუსეთის არმიის საუკეთესო სპეცნაწილები იბრძვიან. ეს აგრესია მანამ გაგრძელდება, ვიდრე მათ ეს ხელეწიფებათ... პუტინის მიზანია უკრაინა ევროპაში არ შეუშვას და ჯერ-ჯერობით ამას ახერხებს.
ის ზეწოლას ახდენს ბალტიის ქვეყნებზე, რომ არაფერი ვთქვათ მოლდოვასა და საქართველოზე, რომლის ოკუპაციასაც დღემდე აგრძელებს.
ეს ნამდვილად შავი ფურცელია ჩვენი ალიანსის ისტორიისთვის.” - განმარტა მაკეინმა.
მისი აზრით, პუტინი დაუსჯელი იმიტომ რჩება, რომ გერმანიისა და საფრანგეთის ხელმძღვანელობამ, 70 წლის განმავლობაში პირველად, ევროპული ქვეყნების დანაწევრება ლეგიტიმური გახადა.
,,ცეცხლის შეწყვეტის რეჟიმი მანამ ირღვეოდა, ვიდრე პუტინმა თავისას არ მიაღწია - უკრაინელებს სტრატეგიულად უმნიშვნელოვანესი სარკინიგზო კვანძი, დებალცევო დაათმობინა. ის ცოტა ხნით უკან დაიხევს, ხოლო შემდეგ მარიუპოლს დაიპყრობს, რათა ყირიმისკენ სახმელეთო გზასაც დაეპატრონოს. გულახდილად რომ გითხრათ, ეს საშინელებაა.” - აღნიშნა რესპუბლიკელმა სენატორმა.
არც თეთრ სახლსა და არც რუსეთის პრეზიდენტის ადმინისტრაციაში მაკეინის განცხადებაზე კომენტარი ჯერ არ გაუკეთებიათ.
18 თებერვალს ჯონ მაკეინმა მეორე რესპუბლიკელ სენატორთან ლინდსი გრემთან ერთად მინსკის ხელშეკრულება გააკრიტიკა და ვაშინგტონი უმოქმედობაში დაადანაშაულა.
თავის მხრივ, აშშ-ს სახელმწიფო დეპარტამენტის სპიკერმა ჯენ პსაკმა, უკრაინისთვის იარაღის მიწოდების საკითხზე დისკუსიისას განაცხადა, რომ აშშ-სა და რუსეთს შორის ომის დაწყება ვერც უკრაინის და ვერც მსოფლიოს ინტერესებს ვერ წაადგება.