პარლამენტის თავმჯდომარე დავით უსუფაშვილი აცხადებს, რომ არასამთავრობო სექტორი საქართველოში იყო და არის და დარჩება თავისუფალი. როგორც უსუფაშვილი აცხადებს მთავარია უზრუნველყოფილი იყოს სიტყვისა და პოლიტიკური თავისუფლება.
,,არასამთავრობო სექტორი საქართველოში იყო და არის თავისუფალი, დარჩება თავისუფალი, მათ შორის ისეთ შემთხვევაში, როდესაც ცდება, ისევე როგორც პოლიტიკოსები, ხან ვცდებით, ხან სწორს ვლაპარაკობთ, მაგრამ თავისუფალი ვრჩებით. მთავარია უზრუნველყოფილი იყოს სიტყვის თავისუფლება, პოლიტიკური თავისუფლება. დანარჩენი ყველას აქვს საშუალება, თავისი აზრი გამოთქვას, სხვამ ამ აზრზე - კიდევ თავისი აზრი გამოთქვას", - განაცხადა უსუფაშვილმა ყოფილი პრემიერის ბიძინა ივანიშვილის განცხადების შეფასებისას.
ყოფილი პრემიერის ბიძინა ივანიშვილის განცხადებით, იგი არასამთავრობო ორგანიზაციებზე კვლევის ჩატარებას გეგმავს, რადგან ამ მიმართულებით ბევრი კითხვა არსებობს.
,,არასამთავრობოებზე ცალკე კვლევას ვაკეთებთ, მთავრობაზე დიდი არასამთავრობოები რომ არიან, მათზე, უფრო სწორად პიროვნებებზე - ლომჯარიაზე, გიგაურზე, კოჟორიძეზე. ჩვენ საინტერესო კვლევას დავდებთ მათზე. ძალიან ბევრი კითხვა გვაქვს. თვითონ მათზე გვაქვს კითხვები, რამდენადაც ტაბუ დაადეს რაღაც საკითხებს - არასამთავრობოებს ვერ შეეხებოდით, ასევე ცდილობდნენ, რომ პრეზიდენტის ინსტიტუტი არ გაგვეკრიტიკებინა", - განაცხადა ივანიშვილმა.
