DVV International-სა და გოეთეს ინსტიტუტის მიერ ერთობლივად დაწესებული გივი მარგველაშვილის სახელობის პრემიის ლაურეატი ჟიურის გადაწყვეტილებით 2015 წელს საქართველოს ეროვნული მუზეუმის გენერალური დირექტორი, საქართველოს მეცნიერებათა აკადემიის წევრ-კორესპოდენტი დავით ლორთქიფანიძე გახდა. ჯილდო ყოველ წელს გაიცემა ქართულ-გერმანული კულტურული ურთიერთობების გაღრმავებაში შეტანილი წვლილისათვის.

ლაუდაციოს წაიკითხავენ პროფ. გია დვალი (მიუნხენის ლუდვიგ-მაქსიმილიანის უნივერსიტეტის თეორიული ფიზიკის კათედრის დეკანი და ჰუმბოლდტის პროფესორი, ასევე მაქს პლანკის ფიზიკის ინსტიტუტის დირექტორი) და პროფ. გიუნტერ შაუერტე (პრუსიის კულტურული მემკვიდრეობის ფონდის ვიცე-პრეზიდენტი). გერმანიიდან ასევე მოწვეულია პროფ. რიტა ზიუსმუტი, გერმანიის სახალხო უნივერსიტეტთა ასოციაციის პრეზიდენტი.

დავით ლორთქიფანიძე საქვეყნოდ აღიარებული მეცნიერი, არქეოლოგი, პუბლიცისტი, მუზეუმის გენერალური დირექტორი და კულტურული მოღვაწეა. გერმანია, გერმანული მუზეუმები, გერმანული მეცნიერება და კულტურა მის საქმიანობაში უკვე სტუდენტობის წლებიდან მოყოლებული თამაშობდა დიდ როლს. 1991 წელს დავით ლორთქიფანიძის ინიციატივით დაიწყო მაინცის რომაულ-გერმანული ცენტრალური მუზეუმისა და საქართველოს მეცნიერებათა აკადემიის არქეოლოგიური კვლევის ცენტრის ერთობლივი სამეცნიერო პროექტი, რომელიც დმანისის პალეოანტროპოლოგიურ ძეგლს იკვლევდა. სწორედ 1991 წელს აქ აღმოჩნდა ადრეული ჰომინიდის ქვედა ყბა, რასაც შემდგომში მოჰყვა სხვა დიდი მნიშვნელობის აღმოჩენები. ამ მონაპოვრებს უდიდესი მნიშვნელობა აქვს საერთაშორისო სამეცნიერო საზოგადოებისათვის. მათ ადამიანის ევოლუციის კვლევაში ახალ თეორიებს დაუდეს საფუძველი. დავით ლორთქიფანიძის ინიციატივით 2007 წელს ბერლინის სახელმწიფო მუზეუმების ანტიკური კოლექციების ალტეს მუზეუმში გაიხსნა გამოფენა "მედეას ოქრო - ახალი აღმოჩენები საქართველოდან", რამაც მნიშვნელოვანი წვლილი შეიტანა ქართულ-გერმანული ურთიერთობების გაღრმავებაში.