"მომავალი წლის ასაღები საგარეო ვალი დაფიქსირებული იყო დოლარში და გაცვლითი კურსის ცვალებადობამ გამოიწვია ის, რომ ლარში მისი მოცულობა გაიზრდება", -ასე უპასუხა ფინანსთა მინისტრმა ნოდარ ხადურმა ჟურნალისტთა შეკითხვას, 2015 წლისთვის ასაღებ საგარეო ვალის მაჩვენებელზე. როგორც ცნობილია, 2015 წლის ბიუჯეტის პროექტის თავდაპირველი ვარიანტის თანახმად, დაგეგმილი იყო 920 მილიონი ლარის ოდენობის ახალი ვალის აღება. შემდგომ კორექტირებულ ბიუჯეტის პროექტში საგარეო ვალის მოცულობა 930 მლნ ლარით იყო განსაზღვრული, ხოლო ბიუჯეტის საბოლოო ვარიანტში ეს თანხა 1,1 მლრდ ლარამდეა გაზრდილი.
"ამავე დროს მნიშვნელო0ვანია, რომ არ იქნება დარღვეული ის პარამეტრები, რომელიც გათვალისწინებულია საქართველოს კანონმდებლობით არის გათვალისწინებული. ასევე საერთაშორისო საფინანსო ინსტიტუტების რეკომენდაციებით.
ჩვენი ბიუჯეტი დეფიციტი არ იქნება 3 %-ზე მეტი და მნიშვნელოვანია, რომ ყველა ის ინფრასტრუქტურული პროექტი, რომელიც ხორციელდება საგარეო დაფინანსების ხარჯზე და ასეთია ძალიან ბევრი, მათ შორის გზების მშენებლობა, წყალ-კანალიზაცია, გარემოს დაცვა, ენერგეტიკული და ინფრასტრუქტურული პროექტები განხორციელდება ეფექტიანად. საზოგადოება ძალიან მალე ნახავს ამ შედეგს",- განაცხადა ფინანსთა მინისტრმა.