საზღვრების უსაფრთხოების უზრუნველყოფა არის ჩვენი ძირითადი სახელმწიფოებრივი მიზანი. ჩვენ დავიცავთ სასაზღვრო ძალების უმნიშვნელოვანეს პრინციპს - ეს არის სახელმწიფო საზღვრის ხელშეუხებლობის გზით საერთაშორისო უსაფრთხოების განმტკიცება,-ამის შესახებ საქართველოს პრემიერ-მინისტრმა სასაზღვრო ინფრასტრუქტურული პროექტების პრეზენტაციაზე სიტყვით გამოსვლისას განაცხადა.
საქართველოს მთავრობის მეთაურმა სასაზღვრო ინფრასტრუქტურის განვითარების მნიშვნელობაზე ისაუბრა და დამსწრე საზოგადოებას ამ მიმართულებით გადადგმული ნაბიჯები გააცნო.
"მხოლოდ წელს სასაზღვრო ინფრასტრუქტურის მშენებლობაში 13 მილიონ ლარამდე დაიხარჯა. 2014 წელს აშენდა და ექსპლუატაციაში შევიდა 10 ახალი სასაზღვრო სექტორი. ესენია: ორი სასაზღვრო სექტორისაქართველო-თურქეთის რესპუბლიკის სახელმწიფო საზღვარზე; სამი სასაზღვრო სექტორი საქართველო - სომხეთის რესპუბლიკის სახელმწიფო საზღვარზე; ორი სასაზღვრო სექტორი საქართველო-აზერბაიჯანის რესპუბლიკის სახელმწიფო საზღვარზე; სამი სასაზღვრო სექტორი საქართველო-რუსეთის სახელმწიფო საზღვარზე. ჩვენ 2014 წლის თებერვლიდან მნიშვნელოვნად გავზარდეთ მესაზღვრეების შრომის ანაზღაურება და გავაუმჯობესეთ მათი სამუშაო პირობები,"-აღნიშნა ირაკლი ღარიბაშვილმა.
მისი ინფორმაციით, ნოემბრის ბოლოს, „აღმოსავლეთთან პარტნიორობის პროგრამის" ფარგლებში, იწყება საქართველოსა და აზერბაიჯანს შორის 5 სასაზღვრო სექტორის მშენებლობა. ასევე იწყება საქართველო-თურქეთის რესპუბლიკის სახელმწიფო დემარკირებულ საზღვარზე ინფრასტრუქტურის მოწყობა.
პრემიერ-მინისტრის თქმით, 2013-2014 წლებში სახელმწიფო საზღვრის დაცვაში მონაწილე მესაზღვრეებს ორ ეტაპად 25-30 პროცენტით, 200-დან 400 ლარამდე ოდენობით გაეზარდათ თანამდებობრივი სარგოები. მომავალ წელს კი დაგეგმილია სახელმწიფო ბიუჯეტიდან სასაზღვრო ინფრასტრუქტურული პროექტების დაფინანსების გაზრდა, რაც აღმასრულებელი ხელისუფლების ორგანოების კოორდინირებულად მოქმედებასთან ერთად, სასაზღვრო სფეროს განვითარებას შეუწობს ხელს.
სიტყვით გამოსვლისას, პრემიერ-მინისტრმა მადლობა გადაუხადა შინაგან საქმეთა სამინისტროს და ქვეყნის სახელმწიფო საზღვრის დამცველებს გაწეული საქმიანობისთვის. მისი თქმით, სწორედ მესაზღვრეების პროფესიონალიზმზე, თავგანწირვასა და პასუხისმგებლობაზეა დამოკიდებული საზღვრების ურღვევობა, საქართველოს სახელმწიფოებრიობა.
პრემიერმა განსაკუთრებული მადლიერებით აღნიშნა ამერიკის შეერთებული შტატების მთავრობის წვლილი და განაცხადა, რომ ამერიკის შეერთებული შტატების დახმარებით აღიჭურვა სასაზღვრო პოლიციის საზღვრის მართვის სისტემის კავშირგაბმულობა თანამედროვე ტექნიკით და დასრულდა მონტაჟი.
"ეს გაცილებით ეფექტიანს და მოქნილს გახდის სახელმწიფო საზღვრის ოპერატიულ მართვას. ეს იქნება მართვისა და კონტროლის იმ გლობალური სისტემის საფუძველი, რომლის იმპლემენტაციას ჩვენი მთავრობა ახლო მომავალში გეგმავს,"-განმარტა პრემიერ-მინისტრმა.
2014 წელს განხორციელებული სასაზღვრო ინფრასტრუქტურული პროექტების ოფიციალური პრეზენტაცია საქართველოს შსს სასაზღვრო პოლიციის სპეციალური დანიშნულების ავიაციის მთავარი სამმართველოს ტერიტორიაზე გაიმართა და მას საქართველოში აკრედიტებული ელჩები და დიპლომატიური მისიების წარმომადგენლები დაესწრნენ.
