თბილისის საკრებულოს არჩევნებში "ქრისტიან-დემოკრატების" რიგებიდან საბურთალოს ოლქში კენჭს ზაზა გაბუნია იყრის.
მაჟორიტარი დეპუტატობის კანდიდატი თარგამაძის გუნდმა ოფიციალურად დღეს წარადგინა.
პარტიის ლიდერის, გიორგი თარგამაძის შეფასებით, ზაზა გაბუნია "შემართული, ენერგიული, პატრიოტი და განათლებული ახალგაზრდაა, რომლის სახითაც საბურთალოს რაიონს მისი ინტერესების დამცველი ეყოლება".
თავად მაჟორიტარი დეპუტატობის კანდიდატის განმარტებით კი, ის რაიონის ყველა ქუჩაზე, ყველა კორპუსთან მივა, რათა ის პრობლემები, რომელიც ადგილობრივებს აწუხებს, საკრებულომდე მიიტანოს.
"მაღალ ტარიფებთან და სხვა სოციალურ პრობლემასთან ერთად ჩვენ ვიზრუნებთ რომ დაძლეულ იქნას კიდევ ერთი პრობლემა, რასაც უიმედობა და ნიჰილიზმი ჰქვია", - განაცხადა გაბუნიამ დღეს გამართულ პრესკონფერენციაზე.
გაბუნია ამომრჩევლებთან შეხვედრებს ხვალიდან დაიწყებს.
შეგახსენებთ, რომ ზაზა გაბუნია თავდაპირველად მოძრაობის ახალგაზრდულ ფრთას ხელმძღვანელობდა, ბოლოს კი "ქრისტიან-დემოკრატების" პრესსპიკერი იყო.
