საფრანგეთის სენატის თავმჯდომარის ჟერარ ლარშეს განცხადებით, "მისტრალის" გაყიდვა "უსაფრთხოების ძალიან მაღალი ნორმების დაცვით მოხდა".
ამის შესახებ ლარშემ ქართველ ჟურნალისტებს, საქართველოს პარლამენტის თავმჯდომარე დავით ბაქრაძესთან შეხვედრის შემდეგ, საფრანგეთის მიერ რუსეთისთვის აღნიშნული სამხედრო ხომალდის მიყიდვის საკითხზე კომენტირებისას განუცხადა.
ამასთან, მისივე განმარტებით, ოფიციალური პარიზი მხარს უჭერს საქართველოს ტერიტორიულ მთლიანობასა და დამოუკიდებლობას და ამ მიმართულებით თბილისს საფრანგეთის მხარდაჭერის იმედი უნდა ჰქონდეს.
"ხაზს ვუსვამ, რომ ჩვენ მხარს ვუჭერთ საქართველოს ტერიტორიულ მთლიანობასა და დამოუკიდებლობას. მეორეს მხრივ, აღვნიშნავ, რომ ტერიტორიული მთლიანობის აღდგენა მხოლოდ მოლაპარაკებების გზით უნდა მოხდეს. ამ თემებზე ჩვენ ერთი თვის წინ ბატონ მედვედევთანაც ვისაუბრეთ. რაც შეეხება "მისტრალს", მისი გაყიდვა უსაფრთხოების ძალიან მაღალი ნორმების დაცვით მოხდა", - განაცხადა საფრანგეთის სენატის თავმჯდომარემ.
