საქართველოს პრეზიდენტი გიორგი მარგველაშვილი არ გამორიცხავს, რომ ე.წ. ფარულ მოსმენებთან დაკავშირებულ კანონთან მიმართებაში, მას შემდეგ რაც პარლამენტი კანონპროექტს დაამტკიცებს, ვეტოს უფლება გამოიყენოს. ამის შესახებ მარგველაშვილმა "არჩევანში" განაცხადა.
პრეზიდენტის თქმით, კანონპროექტის ირგვლივ განვითარებულ მოვლენებს თვალყურს, პრეზიდენტის კომპენტენიიდან გამომდინარე ადევნებს და საკუთარ პოზიციას, მისი კანონად მიღების შემდეგ დააფიქსირებს.
"მიმაჩნია, რომ ეს კანონი უკავშირდება დემოკრატიულ წყობას და მის სტაბილურობას.
კანონზე შესაძლო ვეტო ჩემს ვალდებულებას წარმოადგენს, ასეთი თემა ბუნებრივია განიხილებოდა, თუმცა არ მინდა წინსწრებით, კანონპროექტზე გამოვთქვა ჩემი პოზიცია", - განაცხადა პრეზიდენტმა.
მისი თქმით, კანონპროექტზე შსს-ს საკუთარი მოსაზრების წარმოდგენა სთხოვა, თუმცა შეხვედრა ამ დრომდე არ შემდგარა.
"გამოდინარე იქედან, რომ მაინტერესებდა ყველა მხარის პოზიცია, 3 ოქტომბერს ვთხოვე შინაგან საქმეთა სამინისტროს, წარმოედგინა საკუთარი პოზიცია ჩემთვის, ამ ძალიან მნიშვნელოვან კანონპროექტთან დაკავშირებით. მათ მთხოვეს დრო იმისთვის რომ ჩამოყალიბებულიყვნენ, თუმცა ეს შეხვედრა დღემდე არ შემდგარა", - განაცხადა პრედეზიდენტმა.
პრეზიდენტის თქმით, აღნიშნული საკითხი, საკანონმდებლო რეგულაციების ნორმებს გასცდა და ის საზოგადოებრივ-პოლიტიკური განხილვის საგანი გახდა.
