2 ნოემბრიდან საქართველოს ავიაბაზარზე ოპერირებას ეგვიპტური ავიაკომპანია „Air Cairo" იწყებს, რომელიც, შარმ ელ შეიხი - თბილისი - შარმ ელ შეიხის მიმართულებით პირდაპირ რეგულარულ საჰაერო მიმოსვლას თავდაპირველად კვირაში 2 სიხშირით, ხოლო 9 იანვრიდან 3 სიხშირით განახორციელებს.
ავიაკომპანია „Air Cairo"-მ შესაბამისი განაცხადით უკვე მიმართა საქართველოს სამოქალაქო ავიაციის სააგენტოს.
„Air Cairo" წარმოადგენს უმსხვილესი ეგვიპტური ავიაკომპანიის "EGYPT AIR"-ის 60%-იან წილობრივ საკუთრებაში მყოფ შვილობილ კომპანიას, რომელიც 2003 წელს დაფუძნდა და ჩარტერული ავიაგადამზიდველიდან ერთ-ერთ სწრაფად მზარდ დაბალტარიფიან ავიაკომპანიად ჩამოყალიბდა ეგვიპტის არაბთა რესპუბლიკაში.
როგორც სამოქალაქო ავიაციის სააგენტოში განმარტავენ, ეგვიპტური ავიაგადამზიდველის შემოსვლა ხელს შეუწყობს ქვეყნებს შორის ტურისტული ნაკადების ზრდას. აქამდე საქართველოსა და ეგვიპტეს შორის მიმოსვლა მხოლოდ ჩარტერული ტურისტული ავიარეისებით ხორციელდებოდა.