თბილისის მე-10 მოდის კვირეულის მეორე დღე, 11:30-ზე საქმიანი შეხვედრით იწყება „დიზაინ ცენტრში". კვირეულის 30-მდე სტუმარს შეხვდებიან კულტურის და ძეგლთა დაცვის სამინისტროს, ეკონომიკისა და მდგრადი განვითარების სამინისტროს და ტურიზმის ეროვნული ადმინისტრაციის წარმომადგენლები. სტუმრებისთვის მოეწყობა საქართველოს და თბილისის პრეზენტაცია, გაიმართება ჩვენ ქვეყანაში არსებული ფაბრიკების გამოფენა და საუბარი სფეროში არსებულ სირთულეებზე, გამოწვევებსა და შესაძლებლობებზე.
აღნიშნულთან დაკავშირებით ხვალ, 11:30 საათზე, „დიზაინ-ცენტრში" ვრცლად ისაუბრებს ეკონომიკის მინისტრის მოადგილე ქეთევან ბოჭორიშვილი, რომელიც საერთაშორისო ბაიერებს და მედიას გააცნობს ქვეყნის საინვესტიციო კლიმატს, მთავრობის მიერ განხორციელებულ რეფორმებს და საფეიქრო ინდუსტრიას საქართველოში და პრემიერ-მინისტრის მიერ ინიციირებულ სამთავრობო პროგრამას „აწარმოე საქართველოში" მიმოიხილავს. მეწარმეობის განვითარების სააგენტოსა და ეკონომიკის სამინისტროს ხელშეწყობით მოდის კვირეულზე წარმოდგენილი იქნება ქართული სამკერვალო ფაბრიკების Elselema, Unistyle LTD, Iveria Uniforms, Vogue, L.G.-მიერ შეკერილი ტანსაცმელი. ფაბრიკების ნაწილი უკვე მუშაობს უცხოური დამკვეთებისთვის. მათ შორის კომპანია „Elselema" ზამთრის ტანსაცმელს ისეთი ცნობილი ბრენდისთვის კერავს, როგორიცაა Moncler.
19:00 საათზე „დიზაინ ცენტრში" უკვე ჩვენებები დაიწყება. პირველი მაყურებლის წინაშე წარსდგება ბრენდი Mach & Mach, რომელიც უკვე მეორე სეზონია აქტიურად ჩაერთო მოდის ბიზნესში და საკმაოდ წარმატებულად. 20:00 აკა ნანიტაშვილის ჩვენება გაიმართება. ყაზახეთის მოდის კვირეულის შემდეგ, დიზაინერის კოლექციას ქართველი მაყურბეელიც იხილავს. 21:00 საათზე მოდის სახლი „მატერია" - დიზაინერი გიორგი ქებურია, რომელიც რამდენიმე სეზონის წინ თბილისის მოდის კვირეულის დამწყებ დიზაინერთა კონკურსში გაიმარჯა. 22:00 საათზე გაზაფხული-ზაფხული 2015 წლის კოლექციას ატელიე „კიკალა" წარმოადგენს, დიზაინერი - ლადო ბოკუჩავა.
