პრემიერ-მინისტრის ირაკლი ღარიბაშვილის სახლთან დაკავებულებს, სავარაუდოდ, დღეს დილით გაათავისუფლებენ. ამის შესახებ ადვოკატმა მალხაზ ველიჯანაშვილმა განაცხადა.
მათ ღამე დიღმის წინასწარი მოთავსების იზოლატორში გაატარეს.
ტაბულას ფოტორეპორტიორის ადვოკატ ოთარ კახიძის ინფორმაციით, სასამართლოზე წარმოდგენილი იქნება ვიდეომასალა, რომელიც პირის ბრალეულობის დასადგენად იქნება გამოყენებული.
დღეს დილითვე გადაწყდება, როდის დაინიშნება დაკავებულთა სასამართლო პროცესი.
19 ოქტომბრის საღამოს, პრემიერ ღარიბაშვილის საცხოვრებელ სახლთან, მოსაშვილის 10-ში, სადაც თავდაცვის ყოფილი მინისტრის ბაჩო ახალაიას მხარდამჭერები აქციას მართავდნენ ფიზიკური დაპირისპირების შემდეგ პოლიციამ აქციის რამდენიმე მონაწილე, მათ შორის ტაბულას ფოტორეპორტიორი ალექსანდრე გიორგაძე დააკავა.
აღნიშნულის შესახებ განცხადება გაავრცელა შსს-მ რომელშიც განმარტებულია დაკავების მიზეზები: "19 ოქტომბერს, 19 საათზე, თბილისში, საქართველოს პრემიერ-მინისტრის საცხოვრებელ სახლთან, ბაჩანა ახალაიას მხარდამჭერების და არასამთავრობო ორგანიზაცია „თავისუფალი ზონის" ორგანიზებით აქცია გაიმართა. აქცია საქართველოს კანონის, „შეკრებისა და მანიფესტაციების შესახებ" მე-5 მუხლის მოთხოვნათა (ტრანსპორტის სავალი გზის შეფერხების დაუშვებლობა) უხეში დარღვევით მიმდინარეობდა. ადგილზე მყოფმა საპატრულო პოლიციის თანამშრომლებმა აქციის მონაწილეებს მოუწოდეს მათ მიერ არაერთხელ გადაკეტილი სავალი გზის გახსნისა და კანონის დაცვისაკენ. პოლიციელების კანონიერ მოწოდებას აქციის მონაწილეები არ დაემორჩილნენ, გახდნენ აგრესიულნი და სიტყვიერ შეურაცხყოფას აყენებდნენ როგორც პოლიციელებს, ასევე გამვლელ პირებს. წვრილმანი ხულიგნობის ფაქტის აღკვეთის დროს აქციის მონაწილეებმა წინააღმდეგობა გაუწიეს პოლიციელებს, რის გამოც საქართველოს ადმინისტრაციულ სამართალდარღვევათა კოდექსის 166-ე (წვრილმანი ხულიგნობა) და 173-ე (პოლიციელის კანონიერი მოთხოვნისადმი დაუმორჩილებლობა) მუხლებით დაკავებული იქნა ხუთი მონაწილე. აღსანიშნავია ის გარემოება, რომ აქციის მონაწილეთა შორის მყოფმა დაკავებულმა ტელეარხ „ტაბულა"-ს ჟურნალისტმა ალექსანდრე გიორგაძემ (რომელიც საქართველოს ადმინისტრაციულ სამართალდარღვევათა კოდექსის 166-ე და 173-ე მუხლებით დააკავეს) საპატრულო პოლიციის თანამშრომელს სამსახურებრივი მოვალეობის შესრულების ხელის შეშლის მიზნით ამოაცალა რადიოგადამცემი. რაც შეეხება ადვოკატ რომეო საჯაიას, იგი დაკავებული იქნა ამავე კოდექსის 166-ე მუხლით (წვრილმანი ხულიგნობა). გარდა ამისა საქართველოს სისხლის სამართლის კოდექსის 353-ე მუხლის პირველი ნაწილით (პოლიციის მუშაკის მიმართ წინააღმდეგობა ჩადენილი ძალადობით) დაკავებულია აქციის ერთ-ერთი მონაწილე ლევან კვარაცხელია", - აღნიშნულია განცხადებაში.