ორმხრივი სროლის შედეგად დაჭრილ პოლიციელს ოპერაცია უტარდება, მოქალაქის მდგომარეობა მძიმეა. ორივე მათგანი რეპუბლიკურ საავადმყოფოში არიან მოთავსებულები.
როგორც "ჯი-ეიჩ-ენს" თბილისის რესპუბლიკური საავადმყოფოს საზოგადოებასთან ურთიერთობის სამსახურის ხელმძღვანელმა ნატა ხურციძემ განუცხადა, სავადმყოფოში შეყვანილია ორი პირი. ერთ-ერთი მათგანის მდგომარეობა მძიმე, ის მართვით სუნთქვაზე იმყოფება, მეორე დაჭრილზე კი გადაუდებელი ოპერაცია იგეგმება.
დაჭრილი პოლიციელის მოსანახულებლად შს მინისტრი ალექსანდრე ჭიკაიძე მივიდა.
შგახსენებთ, დღეს, ყაზბეგის ქუჩის N 28-ში ლელა ბეჟანიშვილმა საპატრულო პოლიცია გამოიძახა და მის მეუღლე ბიძინა მურადაშვილსა და შვილს შორის წარმოქმნილი კონფლიქტის შესახებ აცნობა.
შსსს-ს ინფორმაციით, საპატრულო პოლიციის ეკიპაჟი შემთხვევის ადგილზე გამოცხადდა.
საპატრულო პოლიციის თანამშრომლების ადგილზე მისვლისთანავე სადარბაზოში მოქალაქე ბიძინა მურადაშვილის მხრიდან განხორციელდა სროლა. სროლის შედეგად საპატრულო პოლიციის თანამშრომელმა სხეულის მრავლობითი ჭრილობები მიიღო. ბიძინა მურადაშვილის მიერ განხორციელებულ სროლას საპატრულო პოლიციის თანამშრომლის მეწყვილის მიერ საპასუხო გასროლა მოჰყვა. გასროლის შედეგად დაიჭრა მოქალაქე ბიძინა მურადაშვილი.
