ლუგანსკის ოლქიდან გამშვები პუნქტის "იზვარინოს" გავლით დონბასში დაქირავებულთა ახალი ნაკადი შევიდა. ინფორმაციას ამის შესახებ ჯგუფ "საინფორმაციო წინააღმდეგობის" ხელმძღვანელი დიმიტრი ტიმჩუკი ავრცელებს.
"გამშვები პუნქტის "იზვარინოს" გავლით, დონბასის ტერიტორიაზე, რუსეთის ტერიტორიიდან მორიგი კოლონა შემოვიდა. ძირითადად ეს იყო იმ დაქირავებულებით სავსე ავტობუსები, რომლებმაც მომზადება დონის როსტივში მდებარე "გრუს" მომზადების ცენტრში გაიარეს",_ წერს ტიმჩუკი.
მისივე ინფორმაციით, გასული დღეღამის განმავლობაში უკრაინის ტერიტორიაზე ბოევიკების სულ მცირე 40 ავტობუსი შემოვიდა.
ტიმჩუკი ასევე ავრცელებს ინფორმაციას იმის შესახებ, რომ დონეცკში რუსული სადაზვერვო სამსახურის ორი ჯგუფი მუშაობს.
"პირველ ჯგუფში 7 დივერსიის სპეციალისტი შედის, ხოლო მეორე ჯგუფში 5 სპეციალისტი საინფორმაციო -ფსიქოლოგიური ოპერაციების ჩატარების კუთხით",_ აცხადებს ტიმჩუკი.
