საქართველოს პრემიერ-მინისტრის სპეციალური წარმომადგენელი ზურაბ აბაშიძისა და რუსეთის საგარეო საქმეთა მინისტრის მოადგილე გრიგოლი კარასინის შეხვედრა პრაღაში, მომავალ კვირას, სავარაუდოდ, 16 ოქტომბერს გაიმართება. როგორც ,,ჯი-ეიჩ-ენთან" საუბარში აბაშიძემ განაცხადა შეხვედრაზე მხარეები ქვეყნებს შორის ჰუმანიტარული და სავაჭრო-ეკონომიკური საკითხების შესახებზე იმსჯელებენ.
,,შეხვედრა მომავალ კვირას, სავარაუდოდ, 16 ოქტომბერს გაიმართება. ჩვენ გვაქვს ჩვენი დღის წესრიგი რომელიც თავის დროზე დაიგეგმა არაფორმალური რუსულ-ქართული დიალოგის ფარგლებში. ეს არის სავაჭრო-ეკონომიკური, სატრანსპორტო კომუნიკაციები, ჰუმანიტარული საკითხები", _განაცხადა ,,ჯი-ეიჩ-ენთან" საუბარში აბაშიძემ რომელიც იმედოვნებს, რომ შეხევედრა კონკრეტული შედეგით დასრულდება.
,,აქამდე გამართული შეხვედრებიდან გამომდინარე გვაქვს გარკვეული შედეგები. კერძოდ, საქართველოს ექსპორტი რუსეთის ბაზარზე სრულად აღდგა, ისევე როგორც აღდგა სატრანსპორტო კომუნიკაციების უმრავლესობა, მხედველობაში მაქვს სახმელეთო მიმოსვლა, თვის ბოლოდან საუბარია რეგულარული საჰაერო ავიარესების აღგენაზე თბილისი-მოსკოვის მიმართულებით. აღსანიშნავია, რომ კარასინთან შეხვედრისას ვსაუბრობდით იმ ადამიანების შესახებაც რომლებიც რუსეთში არიან დაპატიმრებული და რამდენიმე საქართველოს მოქალაქე უკვე ჩამოვიყვანეთ. აღნიშნული საუბარი კვლავ გაგრძელდება ", _განაცხადა აბაშიძემ.
მისივე განცხადებით კარასინ-აბაშიძის შეხვედრას საქართველოს მხრიდან საგარეო უწყების წარმომადგენელიც დაესწრება.
