საიას თავმჯდომარე კახა კოჟორიძე პრემიერ-მინისტრს ირაკლი ღარიბაშვილს უდანაშულობის პრეზუმციის დარღვევაში ადანაშაულებს და არგუმენტად ღარიბაშვილის მხრიდან "რუსთავი 2"-ის ჟურნალისტის ძმის მისამართით გაკეთებული განცახდება მოყავს.
,,კონსტიტუცია ნათლად განსაზღვრავს, რომ პირი დამნაშავეა მხოლოდ მას შემდეგ, რაც მის მიმართ კანონიერ ძალაში შევა გამამტყუნებელი განაჩენი. მოცემულ შემთხვევაში "რუსთავი 2"-ის ჟურნალისტის ძმის მიმართ არსებობს მხოლოდ პირველი ინსტანციის და აპელაციის განჩინებები აღკვეთის ღონისძიებების შეფარდებასთან დაკავშირებით და არა განაჩენი, ანუ სასამართლოს ამ ეტაპზე არა თუ გამამტყუნებელი განაჩენი არ გამოუტანია, მსჯელობაც კი არ დაუწყია საქმის შინაარსთან დაკავშირებით. ამ კონტექსტში პრემიერ-მინისტრის მხრიდან პირის მოხსენიება დამნაშავედ საქართველოს კონსტიტუციის დარღვევაა", _განაცხადა ჟურნალისტებთან კოჟორიძემ.
კოჟორიძის განცხადებით, ასევე ის გარემოებაც, რომ პრემიერმა სასამართლოს თავისუფლების ხარისხის დასადასტურებლად მოიყვანა ის მაგალითი, რომ "რუსთავი 2"-ის ჟურნალისტის ძმას სასამართლოს პირველმა ინსტანციამ არ შეუფარდა წინასწარი პატიმრობა.
,,ჩემთვის უბრალოდ გაუგებარია, როგორ შეიძლება კონკრეტული პირისთვის პატიმრობის შეფარდება-არშეფარდების საკითხის მიხედვით განვსაზღვროთ სასამართლოს დამოუკიდებლობის ხარისხი, მით უმეტეს, ეს გაუგებარია იმ ვითარებაში, როცა ვიცით, რომ სააპელაციო სასამართლომ შეცვალა პირველი ინსტანციის სასამართლოს განჩინება გირაოს შეფარდების თაობაზე და დაკავებულს პატიმრობა შეუფარდა. მაშინ, პრემიერისვე ლოგიკით, გამოდის სააპელაციო სასამართლო არ არის თავისუფალი, რადგან მან პირის მიმართ წინასწარი პატიმრობის შეფარდების განჩინება დააყენა", - აცხადებს კოჟორიძე.
