საქართველოს პარლამენტის დელეგაცია, ევროპასთან ინტეგრაციის კომიტეტის თავმჯდომარის, ვიქტორ დოლიძის ხელმძღვანელობით, ჟენევაში, ეუთოს საპარლამენტო ასამბლეის შემოდგომის კონფერენციის - „უსაფრთხოების ახალი გამოწვევები - პარლამენტების როლი"მუშაობაში იღებს მონაწილეობას.
კონფერენციის პირველ დღეს უკრაინის კრიზისი განიხილეს. ვიქტორ დოლიძის განცხადებით, რუსეთმა დიდი ხანია, გადაწყვიტა, ევროპის სამხედრო-პოლიტიკური კონიუქტურა შეეცვალა და მიუხედავად იმისა, რომ 1999 წლის სტამბულის სამიტის გადაწყვეტილებები ევროპის უსაფრთხოების ქვაკუთხედად განიხილებოდა, რუსეთის ფედერაციამ ევროპაში ჩვეულებრივი ხელშეკრულების შესახებ შეთანხმებაში (CFE) მონაწილეობაშეწყვიტა, რასაც საქართველოს, მოლდოვას და ახლა უკვე, უკრაინის ოკუპაცია მოჰყვა. საქართველოს პარლამენტის ევროინტეგრაციის კომიტეტის თავმჯდომარის განცხადებით, ყველაფერს სახელი უნდა ეწოდოს. მისივე თქმით,უკრაინაში მიმდინარე მოვლენებს ჰქვია რუსეთის სამხედრო აგრესია და ინტერვენცია მეზობელ ქვეყანაში. ვიქტორ დოლიძემ რუსეთის მხარეს საერთაშორისო ვალდებულებების შესრულებისკენ და საერთაშორისო თანამეგობრობას მეტი აქტიურობისკენ მოუწოდა.
ეუთოს საპარლამენტო ასამბლეის ვიცე-პრეზიდენტმა და საქართველოს პარლამენტის წევრმა, გიორგი წერეთელმა უკრაინაში მიმდინარე პროცესებზე, როგორც მთელი ევროპის უსაფრთხოების პრობლემაზე, ისაუბრა და განაცხადა, რომ მნიშვნელოვანია დისკუსია და დიალოგი ეუთოს საპარლამენტო ასამბლეის ფორმატში. „მიუხედავად შეთანხმებისა, უკრაინის ტერიტორიაზე დღესაც მიმიდინარეობს შეტაკებები და იღუპებიან ადამიანები, რუსეთმა განახორციელა აგრესია უკრაინის ტერიტორიაზე. თუ გვსურს, ეს შეიცვალოს და ეფექტური გახდეს ეუთოს გადაწყვეტილებების მიღება/შესრულება, აუცილებელია შეიცვალოს „კონსესუს - 1" პრინციპი", - განაცხადა სიტყვით გამოსვლისას გიორგი წერეთელმა.
საქართველოს პარლამენტის დელეგაციის წევრებმა ერთხმად დაუჭირეს მხარი უკრაინის დელეგაციის წინადადებას რუსეთ-უკრაინის საზღვარზე სამმხრივი მონიტორინგის ჯგუფის - „რუსეთი-უკრაინა-ეუთო" ჩამოყალიბების თაობაზე.
ეუთოს საპარლამენტო ასამბლეის შემოდგომის კონფერენციის ფარგლებში, საქართველოს საპარლამენტო დელეგაციამ ორმხრივი შეხვედრები გამართა ეუთოს გენერალურ მდივანთან, ლამბერტო ზანიესთან და ასამბლეის პრეზიდენტთან, ილკა კანერვასთან. ვიქტორ დოლიძემ შეხვედრებზე საქართველოში გატარებულ რეფორმებზე, ქვეყნის წინაშე მდგარ საფრთხეებზე, ეუთოს როლის გაძლიერებაზე რეგიონში და ევროატლანტიკურ პროცესებზე ისაუბრა. ევროინტეგრაციის კომიტეტის თავმჯდომარემ ეუთოს საპარლამენტო ასამბლეის ხელმძღვანელობასშესთავაზა, 2016 წლის ასამბლეის სესია საქართველოში, ბათუმში გაიმართოს. ეუთოს საპარლამენტო ასამბლეის ხელმძღვანელობამ მხარი დაუჭირა საქართველოს დელეგაციის ხელმძღვანელის წინადადებას და აღნიშნა, რომ აღნიშნულ საკითხზე გერმანიასთან, როგორც ეუთოს 2016 წლის თავმჯდომარე ქვეყანასთან იმსჯელებენ და გადაწყვეტილებას ამის შემდეგ მიიღებენ. 2016 წლის ასამბლეის ბათუმში ჩატარების საკითხი ვიქტორ დოლიძემ, ასევე, მუდმივმოქმედი კომიტეტის სხდომაზეც დასვა.
საქართველოს საპარლამენტო დელეგაციის შემადგენლობაში საქართველოს პარლამენტის ვიცე-სპიკერი ზურაბ აბაშიძე, ეუთოს საპარლამენტო ასამბლეის ვიცე-პრეზიდენტი და საქართველოს პარლამენტის წევრი გიორგი წერეთელი და პარლამენტის წევრი ლევან ბეჟაშვილი შედიან.
