სახალხო დამცველმა ქუთაისში მომხდარი ფაქტის შესწავლა დაიწყო.სახალხო დამცველის ოფისის ინფორმაციით, საქართველოს სახალხო დამცველი მომხდარის გამო მწუხარებას გამოთქვამს და მიიჩნევს, რომ მნიშვნელოვანია, საგამოძიებო ორგანოებმა შემთხვევის სწრაფი, ეფექტური და მიუკერძოებელი გამოძიება უზრუნველყონ.
"საქართველოს სახალხო დამცველის აპარატი ჩართული იქნება გამოძიების მონიტორინგის პროცესში. ამასთან, ამ საკითხისადმი მაღალი საზოგადოებრივი ინტერესის გამო, საქართველოს სახალხო დამცველი იმედოვნებს, რომ საქართველოს მთავარი პროკურატურა უახლოეს დღეებში საზოგადოებას მომხდარ ფაქტთან დაკავშირებით სრულ ინფორმაციას მიაწოდებს. მსგავსი ფაქტები კიდევ ერთხელ ადასტურებს დამოუკიდებელი საგამოძიებო ორგანოს შექმნის აუცილებლობას, რაც ქვეყანაში თავის მხრივ უზრუნველყოფს მიუკერძოებელი საგამოძიებო მექანიზმის არსებობას", - აცხადებენ სახალხო დამცველის აპარატში.
მათივე ინფორმაციით, 3 ოქტომბერს, ქუთაისში, ახალგაზრდობის გამზირზე პოლიციასა და მირზა გოჩუაძეს შორის მომხდარ შემთხვევას გოჩუაძის გარდაცვალება მოჰყვა. პროკურატურის მიერ გავრცელებული ინფორმაციის თანახმად, დასავლეთ საქართველოს საოლქო პროკურატურაში გამოძიება სსკ-ს 333-ე მუხლის მესამე ნაწილის "ბ" ქვეპუნქტით დაიწყო. შემთხვევაში მონაწილე პოლიციელი დაკავებულია.
მასალის გამოყენების პირობები
