საჯარო რეესტრი აგრძელებს.„საკონსულტაციო ბარათების" გამოქვეყნებას, რომლებიც დაგეხმარებათ მარტივად, ზედმეტი ძალისხმევის გარეშე მიიღოთ უძრავი ქონების და ბიზნესის რეგისტრაციისთვის საჭირო ინფორმაცია.
დღევანდელი საკონსულტაციო ბარათის თემაა: "მისამართის დაზუსტება"
უძრავი ნივთის საკუთრების/სარგებლობის დამადასტურებელ დოკუმენტში არსებული არასრული/არასწორი მისამართის არსებობის შემთხვევაში, საჯარო რეესტრის ეროვნული სააგენტო დამისამართების მონაცემების საფუძველზე ახორციელებს გეოგრაფიული ობიექტისათვის, მისი კომპლექსისა და ნაწილებისათვის ახალი მისამართის მინიჭებას.
აღნიშნული ტრანზაქცია ხორციელდება იმ შემთხვევაში, თუ უძრავი ნივთის საკუთრების/სარგებლობის დამადასტურებელ დოკუმენტში: არასრულად ან არასწორად არის მითითებული მისამართი.
მისამართის დაზუსტების წესი და პირობები
მისამართის დაზუსტების მოთხოვნით დაინტერესებულმა პირმა უნდა მიმართოს საჯარო რეესტრის ეროვნული სააგენტოს ტერიტორიულ სამსახურს ან იუსტიციის სახლს.
სარეგისტრაციოდ წარსადგენი დოკუმენტები:
1) განცხადება (აღნიშნული ივსება შესაბამის ელექტრონულ პროგრამაში უშუალოდ დოკუმენტების მიმღები ოპერატორის მიერ);
2) დაინტერესებული პირის პირადობის დამადასტურებელი დოკუმენტის ასლი;
3) საკუთრების/სარგებლობის დამადასტურებელი დოკუმენტი.
მისამართის დაზუსტება ხორციელდება 30 კალენდარული დღის ვადაში მომსახურების საფასურის გადახდის გარეშე. ვადის ათვლა იწყება განცხადების შეტანის დღეს და მთავრდება ვადის ბოლო დღის გასვლასთან ერთად.თუ ვადის ბოლო დღე ემთხვევა უქმე ან დასვენების დღეებს, ვადის ბოლო დღეს წარმოადგენს მომდევნო სამუშაო დღე.
დამატებითი ინფორმაცია
თუ დაინტერესებულ პირს სარეგისტრაციო წარმოებაში მონაწილეობის მიღება სურს არა პირადად, არამედ წარმომადგენლის მეშვეობით, ასეთ შემთხვევაში დამატებით უნდა იქნეს წარმოდგენილი სათანადო წესით დამოწმებული წარმომადგენლობის დამადასტურებელი დოკუმენტი და წარმომადგენლის პირადობის დამადასტურებელი დოკუმენტის ასლი.
ზემოჩამოთვლილი დოკუმენტების გარდა, საჯარო რეესტრის ეროვნული სააგენტოს მხრიდან კონკრეტულ შემთხვევაში შესაძლებელია დამატებით მოთხოვნილ იქნეს ნებისმიერი დოკუმენტი/ინფორმაცია, რაც აუცილებელია განცხადებით მოთხოვნილ საკითხზე გადაწყვეტილების მისაღებად.
