უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინის მომლაპარაკებელთა ჯგუფი შეერთებულ შტატებში მიემგზავრება, სადაც შაბათს შეხვედრაა დაგეგმილი.
უკრაინის პრეზიდენტმა განაცხადა, რომ ამერიკული მხრიდან არსებობს სიგნალები რუსეთის მიერ უკრაინის წინააღმდეგ ომის დასრულების მიზნით არსებულ მოლაპარაკებების ფორმატებში მუშაობის გაგრძელების მზადყოფნის შესახებ.
„მოლაპარაკებებში პაუზა იყო, დროა ეს დასრულდეს. და ჩვენ ყველაფერს ვაკეთებთ იმისათვის, რომ მოლაპარაკებები ნამდვილად შინაარსიანი იყოს. უკრაინის გუნდი - სამომლაპარაკებლო ჯგუფის პოლიტიკური ნაწილი - უკვე გზაშია და ამ შაბათს ამერიკის შეერთებულ შტატებში შეხვედრას ველით.
დღეს დეტალურად განვიხილეთ უმაროვთან, კირილო ბუდანოვთან და დავით არახამიასთან მოლაპარაკებები. შეხვედრებში მონაწილეობას მიიღებს სერჰიი კისლიცაც. ჩვენი პრიორიტეტია, ყველაფერი გავაკეთოთ მშვიდობის უზრუნველსაყოფად. და მადლობას ვუხდი ყველას, ვინც ამაში გვეხმარება,“ - განაცხადა ზელენსკიმ.
ზელენსკიმ დასძინა, რომ ეროვნული უშიშროებისა და თავდაცვის საბჭოს მდივანი რუსტემ უმეროვი ახლო აღმოსავლეთის ქვეყნებს ეწვია და იცის, თუ რა უსაფრთხოების შეთანხმებების დადებაა მათთან შესაძლებელი.
„ამ კვირაში რუსტემ უმეროვი სპარსეთის ყურის რეგიონის ძირითად დედაქალაქებს ეწვია და დღეს შედეგების შესახებ ანგარიში წარადგინა. ჯერჯერობით ეს მხოლოდ სატელეფონო ზარია. უფრო დეტალური ონლაინ პრეზენტაცია ხვალ იქნება შესაძლებელი. არსებობს გაგება, თუ რა ახალი უსაფრთხოების შეთანხმებების მიღწევაა შესაძლებელი ამ რეგიონის ქვეყნებთან.
არსებობს კონკრეტული რამ, რისი გაკეთებაც მათ შეუძლიათ ჩვენი ქვეყნის მხარდასაჭერად, ჩვენი თავდაცვის - პირველ რიგში, საჰაერო თავდაცვის - მხარდასაჭერად და არსებობს ისეთი რამ, რაშიც ჩვენ შეგვიძლია მათი მხარდაჭერა და უკვე ვუჭერთ მხარს. „შაჰედებისგან“ დაცვის უკრაინელი ექსპერტთა ჯგუფები უკვე იმყოფებიან შესაბამის ქვეყნებში; ყოველდღიურად ვრცელდება ანგარიშები მათი ამოცანების შესრულების შესახებ“. - განაცხადა ზელენსკიმ.
