საქართველოში აშშ-ის ელჩი რიჩარდ ნორლანდი და შეერთებული შტატების დიპლომატიური მისიის თანამშრომლები, ქართველ ხალხს 11 სექტემბრის ტრაგიკული მოვლენების მე-13 წლისთავზე სოლიდარობისა და გვერდში დგომისათვის მადლობას უცდის. როგორც ,,ჯი-ეიჩ-ენს" საელჩოდან აცნობეს ,,გასული წლების მსგავსად, დღეს კიდევ ერთხელ ვიგრძენით ქართველი ერის სითბო და ღრმა გრძნობები, რომელიც მას ამერიკელი ხალხის მიმართ გააჩნია, განსაკუთრებით მათ მიმართ, რომელთაც 13 წლის წინ, იმ ბნელ დღეს ნიუ იორკში, ვირჯინიასა და პენსილვანიაში საყვარელი ადამიანები დაკარგეს.მივიღეთ უთვალავი მხარდაჭერა თქვენი მშვენიერი ქვეყნის ყველა კუთხიდან - ბათუმიდან, ქუთაისიდან, თბილისიდან. არ დავავიწყდით მოქალაქეებსა და საჯარო მოხელეებს, რომელთაც გამოგვიგზავნეს ფოტოები, წერილები, მოაწყვეს ხსოვნის საჯარო ღონისძიებები. ყველაფერი ეს შთამაგონებელი იყო.ამერიკა მთელი გულით მადლობას გიხდით, რომ შეყოვნდით და გაიხსენეთ უდანაშაულო ადამიანები, რომლებიც დაიხოცნენ და ისინი, რომელთაც საყვარელი ადამიანები დაკარგეს. ჩვენ მათ არასოდეს დავივიწყებთ და არასოდეს დავივიწყებთ ქართველების სოლიდარობას", _ნათქვამია საელჩოს მიერ გავრცელებულ გაცხადებაში.
დღეს, 11 სექტემბერს, ნიუ-იორკში მომხდარი ტერორისტული აქტიდან 13 წელი შესრულდება. მსოფლიოს უდიდეს მეგაპოლისში და სხვადასხვა ქალაქში ამ დღისადმი მიძღვნილი ღონისძიებები გაიმართება.
2001 წლის 11 სექტემბერს ნიუ-იორკში, სავაჭრო ცენტრის ტყუპ ცათამბრჯენს, ე.წ. "ტყუპებს" ტერორისტების მიერ გატაცებული ორი თვითფრინავი შეეჯახა. იმ დღეს, გარდა მშვიდობიანი მოქალაქეებისა, დაიღუპა 19 კამიკაძე-ტერორისტი. ამ დღეს ტერორისტების მიერ გატაცებულ იქნა კიდევ 2 თვითმფრინავი, რომელთაგან ერთი ვირჯინიის შტატში, პენტაგონის შენობას შეეჯახა, მე-4 თვითმფრინავი კი, მგზავრთა წინააღმდეგობის შედეგად, პენსილვანიის შტატში, სომერსეტ ქაუნთის ველზე ჩამოვარდა. აღნიშნული ტერორისტული აქტი მსოფლიოს ნომერ პირველი ტერორისტის უსამა ბენ ლადენის მიერ იყო ორგანიზებული.
ტერაქტის მსხვერპლთა ნარჩენების ამოცნობა ოფიციალურად მხოლოდ 2002 წლის 15 სექტემბერს დასრულდა. 2002 წლის 20 აგვისტოს ტერაქტის დროს გარდაცვლილთა პირველი ოფიციალური სია გამოქვეყნდა. მასში 2819 ადამიანია მსოფლიოს 80 ქვეყნიდან.
დღეისათვის, "დნმ"-ის ანალიზითა და ნათესავთა დახმარების შედეგად, ამოცნობილია 1102 ადამიანი. გარდაცვლილთა საშუალო ასაკი 40 წელი იყო. გარდაცვლილთა უმეტესი ნაწილი იყვნენ ადამიანები, რომლებიც გონებრივ შრომას ასრულებდნენ. ესენი იყვნენ პროგრამისტები, ბანკის მოსამსახურეები სადაზღვევო ფირმების წარმომადგენლები. მრავალი მათგანი თავისი კარიერის პიკზე იმყოფებოდა. სულ მცირე 59 გარდაცვლილს ვიცე-პრეზიდენტის თანამდებობა ეკავა.
პენტაგონის შენობაში შეჭრის შედეგად გარდაიცვალა 184 ადამიანი: 120 - თანამშრომელი და 64 - ეკიპაჟის წევრი. 44 ადამიანი დაიღუპა თვითმფრინავში, რომელიც ტერიტორისტებმა მოიტაცეს და რომელიც პენსილვანიამდე არ მიფრინდა.
ამერიკული სპეცსამსახურები მიიჩნევენ, რომ 2001 წლის 11 სექტემბერს ამერიკაში განხორციელებული საჰაერო თავდასხმა "ალ-ქაიდას" 500 ათასი დოლარი დაუჯდა. გერმანიის დაზვერვის სამსახურში ფიქრობენ, რომ ამ ტერაქტრის ორგანიზებისთვის მილიონ დოლარზე მეტი დაიხარჯა. ზარალი კი გაცილებით მეტი - 135 მილიარდი დოლარი, ათასობით გარდაცვლილი და ათი ათასობით დაინვალიდებულ ადამიანი იყო.
2001 წლის 11 სექტემბრის ტერაქტების შემდეგ აშშ-ის სპეცსამსახურებმა 5 ათასზე მეტი ტერორისტი გაანადგურეს ან ტყვედ აიყვანეს.
