ნატო-მ შესთავაზა მოსკოვს პარტნიორობა, თუმცა რუსეთის პასუხი წესების წიგნის გადახევა იყო - მოლდოვაში, საქართველოსა და უკრაინაში კონფლიქტის გაღვივებით, - ამის შესახებ წერს ნატო-ს გენერალური მდივანი ანდერს ფოგ რასმუსენი Financial Times-ში გამოქვეყნებულ სტატიაში.
მისი განცხადებით, უკრაინის წინააღმდეგ რუსეთის აგრესიამ გამოიწვია ის, რომ ნატო უნდა იყოს უკეთ მომზადებული, რათა ასეთ მოულოდნელი თავდასხმებს გაუმკლავდეს.
"დასაწყისშივე, ამ კრიზისს მე ვუწოდე გამოსაფხიზლებელი ზარი ალიანსისთვის და ყველასთვის, ვინც თავდადებულია, რომ ევროპა იყოს ერთიანი, თავისუფალი და მშვიდობიანი. ნატო აგრძელებს თავის საქმიანობას მოკავშირეებისთვის უსაფრთხოების შენარჩუნების კუთხით, მაგრამ ცხადია, რომ კიდევ ბევრი რამ არის ისეთი, რისი გაკეთებაც ჩვენ შეგვიძლია და ასეც უნდა მოვიქცეთ. ნატო ინდივიდუალური მოთამაშეა. ეს არის 28 სუვერენული სახელმწიფოს ალიანსი და ყველა ჩვენი გადაწყვეტილება საერთო კონსენსუსის გზით მიიღება. რამაც შესაძლოა ზოგჯერ მეტი დრო წაიღოს ან იმედგაცრუება გამოიწვიოს, მაგრამ ჩვენ ერთად ბევრად უფრო ძლიერები ვართ, ვიდრე ნებისმიერი ჩვენგანი იქნებოდა ცალ-ცალკე. დღეს, როცა ჩვენ ცივის ომის დასრულების შემდეგ ყველაზე დიდი გამოწვევის წინაშე ვართ, მე ველოდები, რომ ყველა მოკავშირე ყველაფერს გააკეთებს ჩვენი საერთო უსაფრთხოებისთვის. მას შემდეგ, რაც რუსეთში კომუნიზმის ერა დასრულდა, ნატო-მ რამდენჯერმე სცადა მოსკოვთან ჩართულობა, შესთავაზა სწრაფვა სტრატეგიული პარტნიორობისკენ და მთელ რიგ საკითხებზე უფრო მეტი თანამშრომლობა ვიდრე ნებისმიერ სხვა ქვეყანას, რომელიც ნატო-ს წევრი არ არის. რუსეთის პასუხი წესების წიგნის გადახევა იყო - მოლდოვაში, საქართველოსა და უკრაინაში კონფლიქტის გაღვივებით. რუსების მიერ ზურგგამაგრებული სეპარატისტები დაკავშირებულნი არიან მალაიზიის სამგზავრო თვითმფრინავის ტრაგედიასთან. ამ ქმედების გამო ჩვენი სამყარო უფრო საშიში და არაპროგნოზირებადი ადგილი გახდა. ალიანსმა სწრაფად უპასუხა რუსეთის მიერ ყირიმის ანექსიას, მან შეაჩერა მოსკოვთან ყველანაირი პრაქტიკული თანამშრომლობა. ამასთან, შეინარჩუნა დიპლომატიური არხები დიალოგისთვის. ჩვენ გავზარდეთ თანამშრომლობა უკრაინასთან და მივიღეთ სასწრაფო ზომები რათა გავაძლიეროთ ჩვენი მზადყოფნა. ჩვენ უნდა გვყავდეს უფრო მეტი გემები ზღვაში, მეტი თვითმფრინავები ჰაერში და უნდა გვქონდეს უფრო მეტი წვრთნები ხმელეთზე", - აღნიშნულია წერილში.