,,ერთ-ერთი პრიორიტეტი არის პოლიციასა და საზოგადოებას შორის ნდობისა და თანამშრომლობის შემდგომი გაღრმავება", _განაცახდა შს მინისტრმა ალექსანდრე ჭიკაიძემ საკანონმდებლო ორგანოში გამოსვლისას.
მისივე განცხადებით, პოლიცია გააგრძელებს საზოგადოებასა და მის საჭიროებებზე ორიენტირებას.
,,პოლიცია გააგრძელებს საზოგადოებასა და მის საჭიროებებზე ორიენტირებას. ერთ-ერთი პრიორიტეტი არის პოლიციასა და საზოგადოებას შორის ნდობისა და თანამშრომლობის შემდგომი გაღრმავება. განსაკუთრებული ყურადღება დაეთმობა პოლიციის საქმიანობაში ადამიანის უფლებების პატივისცემას, კანონიერების, პროპორციულობის, თანასწორობისა და ნეიტრალურობის პრინციპების დაცვას. 2014 წლის 1 იანვრიდან ამოქმედდა „პოლიციის შესახებ" ახალი კანონი, რომელიც წინა კანონისგან განსხვავებით, ადამიანის უფლებების დაცვის მაღალ სტანდარტებს ითვალისწინებს. მიმდინარეობს და გაგრძელდება პოლიციელთა გადამზადება ახალი ნორმატიული ბაზის შესაბამისად. შსს-ს ერთ-ერთ პრიორიტეტს აკადემიის საგანმანათლებლო პროგრამებში ადამიანის უფლებათა დაცვის საერთაშორისო სტანდარტების სწავლება წარმოადგენს", _განაცახდა ჭიკაიძემ.
მისივე განმარტებით, იზრდება და იხვეწება შსს-ს კრიმინალისტიკური ექსპერტიზის შესაძლებლობები.
,,სამინისტრო აღიჭურვა რადიოაქტიური ნივთიერებების საექსპერტო კვლევის მოწყობილობებითა და სპეციალური საშუალებებით, რომელთა გამოყენებით შესაძლებელია რადიოაქტიური ნივთიერებების სრულყოფილი საექსპერტო კვლევა როგორც ლაბორატორიულ ისე საველე პირობებში. სამინისტროში წარმოებს 500-მდე სხვადასხვა ტიპის ახალი ფსიქოაქტიური ნივთიერებების (ე.წ. „ბიო", „სპაისი") თვისობრივი და რაოდენობრივი ანალიზი. ახალი ავტომატიზირებული ბალისტიკური იდენტიფიკაციის სისტემა BalScan, შესაძლებელს ხდის შედარებითი ბალისტიკური კვლევის ჩატარებისათვის საჭირო დროის რამდენიმე თვიდან 15-20 წუთამდე შემცირებას. დაგეგმილია ექსპერტიზის შესაძლებლობების შემდგომი განვითარება", _განაცხადა ჭიკაიძემ.
