25 ივლისს, 11.00 საათზე საქართველოს საგარეო საქმეთა სამინისტროში მიგრაციის პოლიტიკის შემუშავების კონტექსტში, სავიზო რეჟიმის საკითხებთან დაკავშირებით შეხვედრა გაიმართება. საგარეო საქმეთა სამინისტროს საკონსულო დეპარტამენტის ხელმძღვანელი საერთაშორისო ორგანიზაციების წარმომადგენლებსა და დიპლომატიურ კორპუსს ინფორმაციას მიაწვდის იმ სიახლეების თაობაზე, რომელიც სავიზო რეჟიმის მოწესრიგებასა და ამ თვალსაზრისით სხვადასხვა ქვეყნებთან ახალ სავიზო რეგულაციებს გულისხმობს. შეხვედრაზე ღონისძიების მონაწილეებს ასევე გააცნობენ ცვლილებებს, რომელიც „უცხოელთა და მოქალაქეობის არმქონე პირთა სამართლებრივი მდგომარეობის შესახებ კანონში" შედის.
საგარეო საქმეთა სამინისტროში შეხვედრას მიგრაციის კომისიის წევრები და შესაბამისი სამთავრობო უწყებების წარმომადგენლები დაესრწებიან.
შეგახსენებთ, რომ საქართველოს მთავრობა მუშაობს მიგრაციის სფეროში ერთიანი პოლიტიკის შემუშავებაზე, რაც მიგრაციული პროცესების ეფექტურ მართვასა და მათ შორის სავიზო რეჟიმის მოწესრიგებას გულისხმობს.
