ცესკოს სპიკერმა ეკატერინე აზარაშვილმა მედიას 12:00 სთ-ის მდგომარეობით თვითმმართველობის არჩევნების მეორე ტურის აქტივობა გააცნო. აღნიშნული დროისთვის არჩევნებში 258, 789-მა ამომრჩეველმა მიიღო მონაწილეობა, რაც მეორე ტურის ამომრჩეველთა საერთო რაოდენობის 15.09 % - ია. თბილისში 12:00 სთ-ისთვის კენჭისყრაში სულ 135, 107 ამომრჩეველმა მიიღო მონაწილეობა (14,7%).
როგორც ცესკოს სპიკერმა ჟურნალისტებს განუცხადა, 24 საათიან რეჟიმში მუშაობს ცენტრალური საარჩევნო კომისიის ცხელი ხაზი - 2 51 00 51 და ონლაინ ოპერატორი (www.cesko.ge). მან მოუწოდა არჩევნებში ჩართულ ყველა მხარეს, რომ არჩევნებთან დაკავშირებული ნებისმიერი სახის ინფორმაცია მიაწოდონ საარჩევნო ადმინისტრაციას.
ცესკოს სპიკერმა ასევე შეახსენა არჩევნებში ჩართულ მხარეებს, რომ საარჩევნო კანონმდებლობის მიხედვით, კენჭისყრის დღეს, კენჭისყრის შენობაში იკრძალება საარჩევნო აგიტაცია. ასევე აკრძალულია წინასაარჩევნო ფასიანი და უფასო რეკლამის განთავსება ტელევიზიისა და რადიოს ეთერში და კენჭისყრის დღის 20:00 საათამდე არჩევნებთან დაკავშირებული საზოგადოებრივი აზრის გამოკითხვის შედეგების გამოქვეყნება.
დღის განმავლობაში, ყოველ ორ საათში ერთხელ ცესკო მოსახლეობას მიაწვდის დეტალურ ინფორმაციას კენჭისყრის მიმდინარეობის შესახებ. ამომრჩეველთა აქტივობაზე განახლებულ ინფორმაციას ცესკო 15:30 საათზე დაგეგმილ ბრიფინგზე წარმოადგენს.
"საქართველოს საარჩევნო ადმინისტრაცია მოგიწოდებთ აქტიური მონაწილეობა მიიღოთ კენჭისყრის პროცესში," - განაცხადა ეკატერინე აზარაშვილმა.
