10:00 სთ-ის მდგომარეობით ყველაზე მაღალი აქტივობა ხონში, ყველაზე დაბალი კი ბათუმში ფიქსირდება. ცესკოს ინფორმაციით, 10:00 საათის მონაცემებით, ხონში ამომრჩეველთა აქტივობამ 13.2% შეადგინა, ბათუმში კი 4.6%.
რაც შეეხება ამორჩევლის აქტივობას უშუალოდ თბილისში, ამ კუთხით ყველაზე ჩუღურეთი გამოირჩევა, ხოლო ამომრჩეველთა პასიურობით ისნის რაიონი ლიდერობს.
შეგახსენებთ, რომ დღეს, 12 ივლისს, ადგილობრივი თვითმმართველობების არჩევნების მეორე ტური მიმდინარეობს.
ამომრჩევლებს, უკვე მეორედ, მერებისა და გამგებლების არჩევა 8 თვითმმართველ ქალაქსა და 13 მუნიციპალიტეტში მოუწევთ.დედაქალაქთან ერთად, მერების ასარჩევად მეორე ტური რუსთავში, მცხეთაში, გორში, თელავში, ოზურგეთში, ბათუმსა და ფოთში გაიმართება.
თბილისში "ქართული ოცნების" კანდიდატი დავით ნარმანია და "ერთიანი ნაციონალური მოძრაობის" კანდიდატი ნიკა მელია დაუპირისპირდებიან ერთმანეთს.კოალიცია "ქართული ოცნებისა" და "ერთიანი ნაციონალური მოძრაობის" კანდიდატები მერობისთვის იბრძოლებენ ასევე რუსთავში, ბათუმსა და თელავში.
რაც შეეხება დანარჩენ თვითმმართველ ქალაქებს - ქალაქ გორში მეორე ტურში "ქართული ოცნებისა" და "ირაკლი ოქრუაშვილი-ქართული პარტიის" მერობის კანდიდატები იყრიან კენჭს. ოზურგეთსა და ფოთში კი ერთმანეთს "ქართული ოცნების" და "დავით თარხან-მოურავი - საქართველოს პატრიოტთა ალიანსის" მერობის კანდიდატები დაუპირისპირდებიან.
ამომრჩევლები, მერებთან ერთად, გამგებლებს 13 მუნიციპალიტეტში: ახმეტაში, ყვარელში, გორში, თიანეთში, მარტვილში, ქობულეთში, ბაღდათში, ხონში, ტყიბულში, ლანჩხუთში, თერჯოლაში, თელავსა და ხულოში აირჩევენ.
