,,ნაცმოძრაობის" თბილისის მერობის კანდიდატმა ნიკა მელიამ საკუთარი არჩევანი ჩიტაძის ქუჩაზე მდებარე #6-ე საარჩევნო უბანზე დააფიქსირა და განაცხადა, რომ ამომრჩეველმა დღეს უნდა აირჩიოს ის მერი, რომელიც იქნება ანგარიშვალდებული თბილისელებთან.
"დღეს უნდა ავირჩიოთ დედაქალაქის მერი, რომელიც იქნება დამოუკიდებელი თავის გადაწყვეტილებებში და იქნება ანგარიშვალდებული თბილისელებთან, ვინც დღეს არჩევანს აკეთებს და არა ცალკეულ, ერთ პოლიტიკურ გაერთიანებასთან ან კიდევ უფრო უარესი ერთ ადამიანთან. მიმაჩნია, რომ დედაქალაქის მერი უნდა იყოს ყველას მერი, მიუხედავად პოლიტიკური გემოვნებისა და შეხედულებებისა, ეს მეათე ხარისხოვანია. იმიტომ რომ ამ ქალაქში ყოველთვის იცხოვრებენ სხვადასხვა შეხედულების ადამიანები, ეს კარგია, რადგან არ შეიძლება ყველანი ვიყოთ ერთ ჭკუაზე, თუმცა დედაქალაქის მერს არა აქვს იმის უფლება, რომ იგი ასოცირდებოდეს მხოლოდ ერთ ცალკე აღებულ პოლიტიკურ ძალასთან", - განაცხადა ნიკა მელიამ.
