ამომრჩეველთა აქტივობის პირველ მონაცემებს ცესკო 10:30- ზე გამოაქვეყნებს, - ამის შესახებ ცესკოს თავმჯდომარემ თამარ ჟვანიამ ცესკოში საინფორმაციო ბრიფინგზეგანაცხადა. მისი თქმით, დღის განმავლობაში საარჩევნო ადმინისტრაცია ყოველ ორ საათში ერთხელ მიაწვდის ამომრჩევლებს დეტალურ ინფორმაციას კენჭისყრის მიმდინარეობის და ამომრჩეველთა აქტივობის შესახებ.
თამარ ჟვანიამ კიდევ ერთხელ შეახსენა მოსახლეობას, რომ თვითმმართველობის არჩევნების მეორე ტური ტარდება 8 თვითმმართველ ქალაქში (თბილისი, რუსთავი, მცხეთა, გორი, თელავი, ოზურგეთი, ბათუმი, ფოთი) და 13 მუნიციპალიტეტში (ახმეტა, თელავი, ყვარელი, გორი, თიანეთი, ხონი, ბაღდათი, ტყიბული, თერჯოლა, მარტვილი, ლანჩხუთი, ქობულეთი, ხულო).
არჩევნების დღეს 24 საათიან რეჟიმში მუშაობს ცენტრალური საარჩევნო კომისიის მედია ცენტრი და ცხელი ხაზი 2 51 00 51, ონლაინ ჩატი და ონლაინ ოპერატორი (www.cesko.ge). ამომრჩევლებს შესაძლებლობა ექნებათ მოგვაწოდონ არჩევნებთან დაკავშირებული ნებისმიერი სახის ინფორმაცია.
ბრიფინგის ბოლოს, თამარ ჟვანიამ ამომრჩევლებს აქტიურობისკენ მოუწოდა.