პარლამენტის თავმჯდომარის დავით უსუფაშვილის განცხადებით, ივლისის თვეში პარლამენტის რიგგარეშე სესია გაიმართება, სადაც სხვა საკითხების განხილვასთან ერთად, ასოცირების ხელშეკრულების რატიფიცირება მოხდება.
„გაიმართება საკომიტეტო მოსმენები და ჩვენ ყველანი ერთად, კიდევ ერთხელ კარგად გავაანალიზებთ ყველა იმ პროცესს და პროცედურას, რაც უნდა მოჰყვეს დოკუმენტის ხელმოწერას და საქართველოს მიერთებას ევროკავშირთან. გილოცავთ, ჩვენ გარკვეული გაგებით ვართ თანამონაწილე იმ პროცესისა, რომელიც ამ წუთებში ბრიუსელში მიმდინარეობს", - აღნიშნა დავით უსუფაშვილმა ბიუროს სხდომაზე.
დღესვე ბიუროს წევრებმა დღის წესრიგით გათვალისწინებულ საკითხებზე იმსჯელეს და საორგანიზაციო საკითხები განიხილეს.
შეგახსენებთ, რომ პროცედურის მიხედვით, ევროკავშირთან საქართველოს ასოცირების ხელშეკრულების რატიფიცირება ასევე ევროკავშირის 28 სახელმწიფომ უნდა მოახდინოს.
