საქართველოს პრეზიდენტმა გიორგი მარგველაშვილმა ბათუმში საქართველოს თავდაცვისა და უსაფრთხოების კონფერენციის (GDSC) მონაწილეებს სიტყვით მიმართა. საერთაშორისო ფორუმი საქართველოს თავდაცვის მინისტრმა ირაკლი ალასანიამ გახსნა.
საქართველოს პრეზიდენტმა სიტყვით გამოსვლისას ბათუმში ტრადიციად ქცეული საერთაშორისო ფორუმის გამართვის მნიშვნელობაზე საუბრისას ქვეყანაში დემოკრატიულად ჩატარებული არჩევნების არსსაც შეეხო.
ქვეყნის პირველმა პირმა კონფერენციაზე სიტყვით გამოსვლისას ხაზგასმით აღნიშნა საქართველოს წვლილი მსოფლიო მასშტაბის თავდაცვისა და უსაფრთხოებისათვის და ყურადღება თავდაცვის სამინისტროში გატარებულ მნიშვნელოვან რეფორმებზეც გაამახვილა.
„ჩვენი მონაწილეობა საერთაშორისო მისიებში ცხადყოფს ჩვენს შემართებას და პასუხისმგებლობას გლობალური უსაფრთხოების თვალსაზრისით. ჩვენი ეროვნული უსაფრთხოების ნაწილი გახლავთ ის, რომ ჩვენ ვეძებთ მეგობრებს და არა მტრებს. ჩვენ მტკიცედ გვწამს ჩვენი ევროპელი პარტნიორების, "- განაცხადა გიორგი მარგველაშვილმა.
საქართველოს პრეზიდენტმა საზოგადოებას ასოცირების ხელშეკრულების ხელმოწერა მიულოცა და მის მნიშვნელობაზეც ისაუბრა. გიორგი მარგველაშვილმა აღნიშნა, რომ ასოცირების ხელშეკრულება ქვეყანას კეთილდღეობას მოუტანს, დემოკრატიულ ინსტიტუტებს გააძლიერებს, ხოლო მთავრობას უფრო პასუხისმგებელსა და საზოგადოების საჭიროებებზე ორიენტირებულს გახდის.
„მტკიცედ მწამს, რომ ასოცირების ხელშეკრულება, რომელსაც რამდენიმე საათში მოეწერება ხელი, იქნება დასაწყისი ახალი პროცესისა, რომელიც გაცხადებულია ჩვენი პოლიტიკური ხელმძღვანელობისა და მთელი ერის მიერ. ასოცირების ხელშეკრულება არის ახალი ნაბიჯი ევროკავშირის სრულ წევრობამდე, ჩვენ გამოვიყენებთ ამ სარგებელს, როგორც განაცხადს ევროპულ სტრუქტურებში გასაწევრებლად", - განაცხადა საქართველოს პრეზიდენტმა.
გიორგი მარგველაშვილმა რეგიონში განვითარებულ მოვლენებზეც ისაუბრა და აღნიშნა, რომ პასუხისმგებლობა უკრაინაში შექმნილი მდგომარეობისათვის ყველამ უნდა გაიზიაროს. საქართველოს პრეზიდენტმა 2008 წლის კონფლიქტზეც ისაუბრა და ხაზგასმით აღნიშნა, რომ ეს კონფლიქტი საფუძვლიანად გაანალიზებული არ არის:
„მინდა განვაცხადო, რომ ძირითადი გადაწყვეტილებები, რომლებიც მიღებულ იქნა 2008 წელს, არ შესრულდა. საერთაშორისო საზოგადოებამ, ყოველმა ჩვენგანმა, ისინი ბოლომდე ვერ მივიყვანეთ. ოკუპირებული ტერიტორიების სტატუსი - საქართველოში ეს არის აფხაზეთისა და ცხინვალის რეგიონი - ჯერ კიდევ არ არის გადაწყვეტილი იმ ხელშეკრულების ჩარჩოში, რომელიც 2008 წლის აგვისტოში გაფორმდა.
შესაბამისად, ნაწილი პასუხისმგებლობისა იმისათვის, რაც მოხდა ყირიმში, ჩვენს მხრებზეა, ვინაიდან ერთიანობას ვერ მივაღწიეთ. დღეს მტკიცედ ვაცხადებთ, რომ უკრაინული პრობლემების მოგვარება უნდა მოხდეს ჩვენი დასავლელი პარტნიორების ჩაბმულობით," - განაცხადა საქართველოს პრეზიდენტმა.
საერთაშორისო კონფერენციას ესწრებოდნენ როგორც დიპლომატიური კორპუსის, ასევე ეროვნული უსაფრთხოების სექტორის, არასამთავრობო და საერთაშორისო ორგანიზაციების წარმომადგენლები.
