,,ადამიანის უფლებების სწავლებისა და მონიტორინგის ცენტრის" (EMC) დირექტორი, კონსტიტუციონალისტი ვახუშტი მენაბდე ,,ჯი-ეიჩ-ენთან" საუბარში აცხადებს, რომ პრეზიდენტის მიერ ასოცირების ხელშეკრულებაზე პრემიერ-მინისტრისთვის ხელმოწერის ერთჯერადად გადაცემის უფლებამოსილების მინიჭების გადაწყვეტილებამ სამ გარემოებას გაუსვა ხაზი. ერთ-ერთი არის ის, რომ პრეზიდენტმა აჩვენა ვის აქვს პირველადი პრეროგატივა ევროკავშირთან ასოცირების ხელმოწერაზე.
,, საქართველოს პრეზიდენტმა აღნიშნული ნაბიჯით სამ რამეს გაუსვა ხაზი. ერთი ის რომ მან აჩვენა ვის აქვს პირველადი პრეროგატივა ევროკავშირთან ასოცირების ხელმოწერის და არა მარტო ხლმოწერის, არამედ დელეგირებისაც. მეორე_პრეზიდენტმა ამ ჟესტით დააფიქსირა, რომ ყოველგვარი დისკუსია ამოწურულია და უკვე ვიცით თუ ვინ მოაწერს ხელს ასოცირების ხელშეკრულებას და მესამე გარემოება არის ის რომ, მომავალში ყოველგვარი სპეკულაციას დაესვა წერტილი პრემიერის ხელმოწერის შემთხვევაში ევროკავშირთან ასოცირების ხელშეკრულების შესაძლო ლეგიტიმურობასთან დაკავშირებით, ", _განაცხადა ,,ჯი-ეიჩ-ენთან" საუბარში მენაბდემ.
შეგახსენებთ, რომ პრეზიდენტმა გიორგი მარგველაშვილმა პრემიერ-მინისტრს ირაკლი ღარიბაშვილს ევროკავშირთან ასოცირების ხელშეკრულების ხელმოწერაზე უფლებამოსილება ერთჯერადად გადასცა. ამის შესახებ, პრეზიდენტის საპარლამენტო მდივანმა დავით პატარაიამ განმარტა. "როგორც მოგეხსენებათ, საქართველოსა და ევროკავშირს შორის ასოცირების შეთანხმება უნდა დაიდოს 27 ივნისს. ეს არის შეთანხმება, რომელსაც უაღრესად დიდი მნიშვნელობა აქვს ქვეყნისთვის. კონსტიტუციის მიხედვით, ამ ყოვლისმომცველ შეთანხმების დადების უფლებამოსილება პრეზიდენტის უფლებამოსილების სფეროშია. მთავრობამ მიიღო გადაწყვეტილება, რომ განზრახული აქვს ხელშეკრულების ხელმომწერად განისაზღვროს საქართველოს პრემიერ-მინისტრი. ვინაიდან აუცილებელია საქართველოს პრემიერი-მინისტრის ხელმოწერის უფლება განხორციელდეს ისე, რომ არც დღეს და რაც განსაკუთრებით მნიშვნელოვანია არც მომავალში, არ დაისვას კითხვის ნიშნები ხელმოწერის ლეგიტიმურობასთან დაკავშირებით, საქართველოს პრეზიდენტმა გადაწყვიტა მისთვის მინიჭებული უფლებამოსილება ერთჯერადად გადასცეს საქართველოს პრემიერ-მინისტრს", - განაცხადა დავით პატარაიამ და დასძინა - "საერთაშორისო ხელშეკრულებების შესახებ საქართველოს კანონის მე-11 და მე-13 მუხლების შესაბამისად, ამ შეთანხმების ხელმოწერის შესახებ გადაწყვეტილებას იღებს საქართველოს პრეზიდენტი ბრძანებულების სახით, რომელიც საჭიროებს პრემიერის კონტრასიგნაციას. შესაბამისად, გაცნობებთ, რომ დღეს ვუგზავნით საქართველოს მთავრობას შესათანხმებლად პრეზიდენტის ბრძანებულებას, რომლის მიხედვით, მათ შორის საქართველოს პრეზიდენტი პრემიერ-მინისტრს ანიჭებს ხელშეკრულებაზე ხელმოწერის უფლებამოსილებას. იმედი გვაქვს, მთავრობასა და პრეზიდენტის შორის შეთანხმების კონსტიტუციური პროცედურა უახლოეს დღეებში დასრულდება"_განაცხადა პატარაიამ.
