მსოფლიო ბანკის აღმასრულებელ დირექტორთა საბჭომ საერთაშორისო განვითარების ასოციაციის (IDA) მიერ ირიგაციის და მიწის ბაზრის განვითარების პროექტის 50 მილიონი ა.შ.შ. დოლარით დაფინანსების გადაწყვეტილება დაამტკიცა.
პროექტის მიზანია ქვეყნის კონკრეტულ რეგიონებში ირიგაციის და სადრენაჟე სისტემების განვითარება.ასევე, იმ პოლიტიკის და პროცედურების გაუმჯობესება, რომლებიც მიწის რეგისტრაციის ეროვნული პროგრამის საფუძველს შეადგენს. აღნიშნული პროექტი სამ კომპონენტს მოიცავს: საირიგაციო და სადრენაჟე სისტემების გაუმჯობესება, მიწის ბაზრის განვითარება და პროექტის მენეჯმენტი.
პროექტის განხორციელების შედეგად სოფლად მცხოვრები დაახლოებით 31,000 ოჯახი, რომელიც26,000 ჰექტარის ფართობის სასოფლო-სამეურნეო დანიშნულების მიწას ამუშავებს, სოფლის მეურნეობის გაზრდილი პროდუქტიულობით პირდაპირ სარგებელს მიიღებს. გარდა ამისა, დაახლოებით 19,000 ოჯახი, რომლებსაც მიწის რეგისტრაციისთვის შერჩეულ საპილოტე რაიონებში არარეგისტრირებული სასოფლო-სამეურნეო დანიშნულების მიწის ნაკვეთები გააჩნიათ, პროექტის ფარგლებში გაუმჯობესებული წესებით და პროცედურებით ისარგებლებენ.მათ საკუთარი ნაკვეთების დარეგისტრირების შესაძლებლობაც მიეცემათ.
„პროექტი შემოსავლების ზრდის თვალსაზრისით არსებული სხვაობის შემცირებას შეუწყობს ხელს და თავის წვლილს შეიტანს მსოფლიო ბანკის ორი ძირითადი მიზნის განხორციელებაში - სიღარიბის შემცირებასა და საერთო კეთილდღეობის გაზრდაში. ეს კი სოფლის მეურნეობაში ჩართული შიდა მეურნეობების პროდუქტიულობის ზრდით მოხდება, რომელთა უდიდესი ნაწილი საქართველოს მოსახლეობის ყველაზე ღარიბ 40 პროცენტში მოიაზრება. ყოველივე ჩამოთვლილი საირიგაციო და სადრენაჟე მომსახურების უკეთ მიწოდებითა და, ფერმერებისთვის მიწის ნაკვეთების რეგისტრაციით მფლობელობის განმტკიცებისსაშუალებით მოხდება"- განაცხადა მსოფლიო ბანკის რეგიონულმა დირექტორმა სამხრეთ კავკასიაში, ჰენრი ქერალიმ.
პროექტს თავისი წვლილი შეაქვს მსოფლიო ბანკის ჯგუფის 2014-2017 ფინანსური წლების საქართველოსთან თანამშრომლობის ახალი სტრატეგიის ინფრასტრუქტურის და მომსახურების ნაწილის განხორციელებაში. ამ გზით ხელი უნდა შეეწყოს ეკონომიკურ ზრდას, სამუშაო ადგილების შექმნას და კონკურენტუნარიანობის ამაღლებას, რის შედეგადაც, კერძო სექტორის განვითარების საფუძველზე, ყოვლისმომცველი ეკონომიკური ზრდის დაჩქარება მოხდება.
პროექტი ასევე საქართველოს მთავრობის დოკუმენტის- მდგრადი განვითარების სტრატეგია 2020 - ორ პრიორიტეტს ეხმიანება, რომლებიც ფერმერების და სოფლის მეურნეობის საწარმოების კონკურენტუნარიანობის ზრდაში მდგომარეობს.აღნიშნული, კონკრეტულად, მიწის ბაზრის განვითარების მნიშვნელობას და სოფლის მეურნეობის ინფრასტრუქტურის გაუმჯობესებას ეხება. ეს უკანასკნელი ფაქტორი ირიგაციის გაუმჯობესების მნიშვნელობაზეა ფოკუსირებული. პროექტი ამ პრიორიტეტებთან იქნება თანხვედრაში, რადგან მის ფარგლებში, კონკრეტულ რაიონებში, საირიგაციო და სადრენაჟე სისტემების რეაბილიტაცია მოხდება. გარდა ამისა, ამ პროექტის მეშვეობით, წყლის კომპანიების შესაძლებლობების გაუმჯობესება მოხდება, რათა მათ ამ სისტემების უფრო ეფექტურად მართვა შეძლონ.
„აღნიშნული საქმიანობა ხელს შეუწყობს სოფლის მეურნეობის პროდუქტიულობის ზრდას და უფრო მაღალი ღირებულების მქონე კულტურებზე გადასვლის საშუალებას გააჩენს, რაც სოფლად (მათ შორის სოფლის მეურნეობის პროდუქტების მწარმოებელ და გადამამუშავებელ აგრობიზნესში) შემოსავლის ზრდას შეუწყობს ხელს. გარდა ამისა, პროექტი კონკრეტულ რაიონებში მიწის მფლობელობის განმტკიცებას მოახდენს, რაც შიდა მეურნეობებს კაპიტალზე წვდომას გაუზრდის და სოფლის მეურნეობაში ინვესტიციების სტიმულირებას შეუწყობს ხელს", - აღნიშნა მსოფლიო ბანკის ირიგაციის და მიწის ბაზრის განვითარების პროექტის გუნდის ლიდერმა, პიტერ გუდმანმა.
მას შემდეგ, რაც 1992 წელს საქართველო მსოფლიო ბანკის წევრი ქვეყანა გახდა, სულ 57 პროექტი განხორციელდა, რომელთა საერთო ღირებულება 1.95 მილიარდ ა.შ.შ. დოლარს აჭარბებს. აღნიშნული თანხები საერთაშორისო განვითარების ასოციაციის კრედიტების და გრანტების და რეკონსტრუქციისა და განვითარების საერთაშორისო ბანკის სესხების სახით იქნა გაცემული. მიმდინარე პორტფელი შვიდი აქტიური საინვესტიციო პროექტისგან შედგება, რომელთა საერთო ღირებულება 600 მილიონ ა.შ.შ. დოლარს შეადგენს.
