ამერიკული კომპანია AECOM-ის და მისი პარტნიორი თურქული კომპანია DIA holding-ის წარმომადგენლები, რომლებიც გეგმავენ საქართველოს ბაზარზე აქტიურ პოზიციონირებას საპარტნიორო ფონდის მენეჯენტს შეხვდნენ. საუბარი შეეხო შავ ზღვაზე ახალი პორტის მშენებლობის პროექტს და მასში ჩართვის შესაძლებლობებს.
როგორც საპარტნიორო ფონდის აღმასრულებელმა დირექტორმა ირაკლი კოვზანაძემ აღნიშნა, ამჟამად მიმდინარეობს შავი ზღვის აკვატორიის კვლევა, რათა დადგინდეს პორტის ასაშენებლად საუკეთესო ადგილმდებარეობა. ირაკლი კოვზანაძის თანახმად, კვლევის შედეგები რამდენიმე კვირაში გახდება ცნობილი.
ამერიკული საინჟინრო-საკონსულტაციო კომპანია AECOM გლობალური კომპანიაა, რომლის წლიური ბრუნვა დაახლოებით 8 მილიარდი დოლარია. კომპანია მუშაობს ისეთ მსხვილ პროექტებზე, როგორებიცაა ლოს-ანჯელესის და დელის მეტროების მშენებლობა, პენტაგონის შენობის რეაბილიტაცია და ა.შ. თურქული DIA holding-ის ინტერესის სფეროა მშენებლობა, საგარეო ვაჭრობა და ენერგეტიკა.
სააქციო საზოგადოება საპარტნიორო ფონდი საქართველოს მთავრობის მიერ 2011 წელს დაარსდა. სახელმწიფო ფლობს ფონდის 100 პროცენტს. საპარტნიორო ფონდის აქტივები 5 მილიარდ ლარს აჭარბებს. ფონდი ფლობს „საქართველოს რკინიგზის", „საქართველოს ნავთობისა და გაზის კორპორაციის", „საქართველოს სახელმწიფო ელექტროსისტემის", ელექტროსისტემების კომერციული ოპერატორისა" და ნაწილობრივ, „თელასის" აქციებს. ფონდის ერთ-ერთი მთავარი ამოცანაა საინვესტიციო მიმართულებებთან ერთად, ამ სახელმწიფო სტრატეგიული აქციების სწორი კორპორატიული მართვა.
