ნილს სკოტი და არჩილ ხაბაძე დაესწრებიან საზეიმო ღონისძიებას ბათუმის ბიზნეს ინკუბატორში, რომელსაც ამ დღეებში ხუთი წელი უსრულდება.

აჭარის სოფლის მეურნეობის მინისტრთან - ზაურ ფუტკარაძესთან ერთად ნილს სკოტი ასევე მოინახულებს აჭარის აგროსერვის ცენტრის ქობულეთის ფილიალს და ფერმერთა ხელშეწყობის პროგრამას გაეცნობიან.

ბათუმის ბიზნეს ინკუბატორი დაარსდა 2009 წელს გაეროს განვითარების პროგრამის ხელშეწყობითა და რუმინეთის, ფინეთისა და აჭარის ავტონომიური რესპუბლიკის მთავრობების ფინანსური მხარდაჭერით. მისი მიზანია, დახმარება გაუწიოს მცირე და საშუალო კომპანიებს ბიზნესის განვითარების ადრეულ ეტაპზე. ხუთი წლის განმავლობაში, ინკუბაციის სრული კურსი 30-ზე მეტმა ადგილობრივმა კომპანიამ გაიარა. აქედან 80 პროცენტმა დაიმკვიდრა ადგილი ბიზნეს სამყაროში და შექმნა 600-ზე მეტი მუდმივი და მოკლევადიანი სამუშაო ადგილი ისეთ სფეროებში, როგორიცაა საინფორმაციო ტექნოლოგიები, ვაჭრობა, მომსახურება და მშენებლობა.

აჭარის აგროსერვის ცენტრი ხელს უწყობს ადგილობრივ ფერმერებს და ფერმერთა გაერთიანებებს. კონსულტაცია და ტრენინგი მოიცავს ისეთ სფეროებს, როგორიცაა ბიზნეს განვითარება, უახლესი სასოფლო-სამეურნეო ტექნოლოგიების დანერგვა, აგრონომია, ხილისა და ბოსტნეულის გადამუშავება, მეცხოველეობა, მცენარეთა დაცვა. აგროსერვის ცენტრი აქტიურად თანამშრომლობს ევროკავშირის სოფლის მეურნეობისა და განვითარების სამეზობლო პროგრამასთან - ENPARD, რომელიც ხელს უწყობს სოფლის მეურნეობის განვითარებას საქართველოში.

გაეროს განვითარების პროგრამის (UNDP) 2008 წლიდან მუშაობს აჭარაში. UNDP-ის მრავალმხრივი პროგრამები ხელს უწყობს რეგიონის ეკონომიკურ წინსვლას, სოფლის მეურნეობისა და ბიზნესისა განვითარებას და აჭარის უნიკალური ეკოსისტემის ბიომრავალფეროვნების დაცვას. UNDP-ის პროგრამები ხორციელდება ევროკავშირის, რუმინეთის მთავრობის, ფინეთის მთავრობის, გლობალური გარემოსდაცვითი ფონდის (GEF), აჭარის ავტონომიური რესპუბლიკის მთავრობისა და UNDP-ის მხარდაჭერით.