თავდაცვისა და უშიშროების საპარლამენტო კომიტეტის თავმჯდომარე ირაკლი სესიაშვილი ინიციატივით გამოდის, რომ სამაუწყებლო კომპანია "რუსთავის 2" -ს "ნავიონალური მოძრაობის" ტელევიზია დაერქვას.
როგორც ირაკლი სესიაშვილმა პარლამენტის პლენარულ სახდომაზე განაცხადა, მსგავსი საერთაშორისო პრაქტიკა არსებობს და მსოფლიოში არის ისეთი პარტიები, რომელთაც საკუთარი ტელევიზია აქვთ.
"პირველ რიგში ვადასტურებ ჩემს განსაკუთრებულ პატივისცემას ჟურნალისტების მიმართ, მაგრამ ყველაფერს თავისი სახელი უნდა დაერქვას. მთავარია, არ შეილახოს მედიის თავისუფლება, შეურაცხყოფა არ მიაყენონ ჟურნალისტებს და მათ პროფესიონალიზმს. ჟურნალისტმა იცოდეს, ვის ემსახურება და თუ უნდა, რომ ასეთ სამსახურში იმსახუროს, დაე, იმსახუროს, - თქვა ირაკლი სესიაშვილმა.
ამასთან, პარლამენტარმა ოპოზიციონერი კოლეგები "ნაციონალური მოძრაობიდან" სიცრუესა და სხვისთვის ჩირქის მოცხებაში დაადანაშაულა.
"ფარული მოსმენების თემა ხელოვნურად არის ინსპირირებული. ძალიან მარტივი და ლოგიკური კითხვა მიჩნდება, რატომ უნდა გისმენდეთ ძვირფასო კოლეგებო? აქ რომ გისმენთ, ისიც საკმარისია. 9 წელი რომ გისმენდით, ისიც საკმარისია. ერთმანეთს რომ უსმენდით, ისიც საკმარისია. პირველ რიგში, დაგეწყოთ იმით, რომ საზოგადოებისთვის ბოდიში მოგეხადათ და თუ არ მოუხდიდით, ერთმანეთისთვის მაინც მოგეხადათ ბოდიში ამდენი მოსმენებისთვის, ფარული ჩაწერებისთვის და ასე შემდეგ. მაგრამ მთელი უბედურაბა იმაშია, როცა არ შეგიძლიათ რაიმე კარგი წარმოაჩინოთ, ცდილობთ, ჩვენ მაინც როგორღაც თქვენ დაგემსგავსოთ. ამაზეა აგებული თქვენი პოლიტიკა", - განაცხადა სესიაშვილმა "ნაციონალური მოძრაობის" წევრების მისამართით.
მისივე განცხადებით, ხელისუფლების პრინციპული მოსაზრებაა, მოსმენებს ქვეყანაში წერტილი დაესვას.
