დანიის მოქალაქეები და ამ ქვეყანაში მცხოვრები ქართული დიასპორის წარმომადგენლები თბილისი-კოპენჰაგენის ავიარეისის დანიშვნას ითხოვენ. გასულ წელს საქართველოს 2 500 დანიელი ვიზიტიორი ესტუმრა. ამის შესახებ კოპენჰაგენში ჩემი ყოფნის დროს საქართველოს ელჩმა დანიის სამეფოში ნიკოლოზ რთველიაშვილმა მაცნობა. მან აღნიშნა, რომ დანიელ ტურისტთა რაოდენობა 2013 წელს 2011 წელთან შედარებით გაიზარდა - მაშინ საქართველოს ესტუმრა 1500-მდე დანიელი.
საჭიროა აღინიშნოს, რომ კოპენჰაგენში ევროვიზიისა და სხვა მუსიკალურ თუ სპორტულ ღონისძიებებზე ყოფნის დროს, ჩემთან მოვიდა ასეულობით დანიელი მოქალაქე. დაინახავდნენ თუ არა ჩემს ტანსაცმელს საქართველოს დროშით და წარწერით, მაშინვე მიყვებოდნენ, რომ ისინი უკვე იყვნენ საქართველოში, მეორე ნაწილი კი მეუბნებოდა, რომ ბევრი გაუგიათ საქართველოზე და აპირებდნენ ჩვენთან ჩამოსვლას. ამავე დროს ყველა ერთხმად აღნიშნავდა, რომ საჭიროა დაინიშნოს პირდაპირი ავიარეისები თბილისი - კოპენჰაგენი - თბილისი, თუნდაც ზაფხულობით და თუნდაც კვირაში ერთხელ მაინც, რადგან ფრენა სტამბოლის, რიგის ან სხვა აეროპორტების გავლით ძალიან ხანგრძლივი და დამქანცველია.
იგივე მითხრეს დანიაში მცხოვრებმა ქართველებმა, რომელთა რაოდენობა დაახლოებით 200 ადამიანს შეადგენს და მათი უდიდესი უმრავლესობა დანიაში 1990-იან წლებში არის ჩასული. მათ შორის არიან ექიმები, მხატვრები, მეცნიერები, სპორტსმენები.
დანიაში ქართული დიასპორის ერთერთმა წარმომადგენელმა, წარსულში ცნობილმა მორაგბემ, ქუთაისის "აიასა" და "გელათის" მოთამაშემ დიტო თედოშვილმა აღნიშნა, რომ მას ხშირად მიმართავენ დანიელები თხოვნით, როგორმე მიაწვდინოს ხმა საქართველოს და შესაბამის ავიასამსახურებს იფიქრონ თბილისი - კოპენჰაგენი - თბილისი რეისის დანიშვნაზე, რაც თავის მხრივ ხელს შეუწყობს ორ ქვეყანას შორის არსებულ ეკონომიკურ, ტურისტულ, სპორტულ და კულტურის სფეროებში ურთიერთობების გაღრმავებას.
ბევრ დანიელს სურს ჩამოსვლა საქართველოში დასასვენებლად - ზაფხულშიც და ზამთარშიც, სურთ დაათვალიერონ ჩვენი ქვეყანა, გაეცნონ მის კულტურას და ხალხს. ამ ავიარეისით აგრეთვე ისარგებლებენ დანიაში მცხოვრები სომხეთის და აზერბაიჯანის მკვიდრნი, რომლებიც არ წყვეტენ კონტაქტებს თავის ქვეყნებთან. ზემოაღნიშნული ფაქტორების გათვალისწინებით, თბილისი - კოპენჰაგენი - თბილისი პირდაპირი ავიარეისის დანიშვნა თუნდაც კვირაში ერთხელ მომგებიანი იქნება როგორც მგზავრებისთვის, ასევე ავიაკომპანიებისთვის.
„ჯი-ეიჩ-ენი", თენგიზ პაჭკორია, კოპენჰაგენი - თბილისი
