საარჩევნო ბლოკის „არასაპარლამენტო ოპოზიციის" პრეს-სპიკერმა მანანა ნაჭყებიამ დღეს ბლოკის მხარდამჭერებზე ხელისუფლების მხრიდან ზეწოლის ფაქტები გაასაჯაროვა.
მისი განცხადებით, ცალკეულ რაიონებში ადგილობრივი ხელისუფლების წარმომადგენლების მხრიდან ადგილი აქვს ბლოკის წევრებზე და მათ მხარდამჭერებზე ზეწოლის ფაქტებს.
კონკრეტულად, მანანა ნაჭყებიამ დაასახელა ხარაგაულის და ქარელის მუნიციპალიტეტებში მათ მხარდამჭერებზე ზეწოლის ფაქტები.
ხარაგაულის რაიონის მოქმედმა გამგებელმა და სახელისუფლებო კოალიციის „ქართული ოცნების" გამგებლობის კანდიდატმა კობა ლურსმანაშვილმა 2014 წლის აპრილში თანამდებობას ჩამოაშორა და სხვა დაბალანაზღაურებად სამსახურში გადაიყვანა რწმუნებული ვარძიის ტეროტორიულ ორგანოში შალვა ხიჯაკაძე, რომელიც არის „არასაპარლამენტო ოპოზიციისა" და მისი გამგებლობის კანდიდატის - როინ ხიჯაკაძის მხარდამჭერი . ამ თანამდებობაზე მან თავისი აქტივისტი მზექალა გლუნჩაძე დანიშნა. ასევე, 2014 წლის პირველ მაისს გამგებელმა ხელშეკრულება შეუწყვიტა ვარძიის ტერიტორიული ორგანოს რწმუნებულის თანაშემწეს ზაზა კაკოიშვილს და ხელშეკრულებით ამ თანამდებობაზე აიყვანა თავისი მხარდამჭერი იზოლდა ხიჯაკაძე. 2014 წლის 13 მაისს მან სამსახურიდან წასვლის შესახებ განცხადება დააწერინა ვარძიის ტერიტორული ორგანოს რწმუნებულის მოადგილეს გელა ოკრიბელაშვილს. ზაზა კაკოიშვილიც და გელა ოკრიბელაშვილიც „არასაპარლამენტო ოპოზიციის" მხარდამჭერები არიან.
ანალოგიური ფაქტი არის ქარელის მუნიციპალიტეტშიც, სადაც თანამდებობიდან გაათავისუფლეს შპს „გამწვანების" თანამშრომელი ეკა გაჩეჩილაძე, რომელიც ოპოზიციის მხარდამჭერია. აღნიშნულმა შპს-მ გაიმარჯვა ტენდერში და ახორციელებს ქარელის მუნიციპალიტეტის კეთილმოწყობის სამუშაოებს.
„არასაპარლამენტო ოპოზიცია" აცხადებს, რომ სამწუხაროდ, კვლავ გრძელდება საჯარო სამსახურში მყოფ ოპოზიცის წარმომადგენლებზე ზეწოლა ისეთი „ნაცადი" საშუალებებით, როგორიცაა სამსახურიდან გათავისუფლება ან გათავისუფლების მუქარა, რის გამოც ხშირად ოპოზიციის მხარდამჭერები უარს აცხადებენ განახორციელონ თავიანთი აქტიური საარჩევნო უფლება და კენჭი იყარონ ადგილობრივი თვითმმართველობის ორგანოებში ოპოზიციის სახელით. არის სხვა ანალოგიური შემთხვევებიც, მაგრამ ამ შემთხვევებში ადამიანები, რომლებზეც ზეწოლა განხორციელდა არ თანხმდებიან გასაჯაროვდეს ფაქტები. მათ ზეწოლის შედეგად უარი თქვეს ოპოზიციის სახელით არჩევნებში მონაწილეობაზე და შეინარჩუნეს სამსახურები.
ამ ფაქტებს „არასაპარლამენტო ოპოზიცია" წერილობთ მიაწვდის უწყებათაშორის კომისიას და მოითხოვს მისგან სათანადო რეაგირებას.
