ევროსაბჭოს ადამიანის უფლებათა დაცვის კომისარი ნილს მუიჟნეკსი საქრათველოს ხელიუფლების მისამართით რეკომენდაციას იძლევა, რომლის თანახმად, პროკურორების დანიშვნა, დაწინაურება და კარიერული წინსვლა უნდა განხორციელდეს დამსახურებაზე დაფუძნებული, სამართლიანი და მიუკერძოებელი პროცედურების შესაბამისად, როგორც ეს დადგენილია ევროსაბჭოს მინისტრთა კომიტეტის რეკომენდაციაში სისხლის სამართლის სისტემაში სახელმწიფო ბრალმდებელის როლის თაობაზე.
ევროპის საბჭოს ადამიანის უფლებათა დაცვის კომისარმა ნილს მუიჟნეკსმა საქართველოში განხორციელებული ვიზიტის ანგარიში გამოაქვეყნა, რომლის ერთერთი ქვეთავი მართლმსაჯულების აღსრულებას ეხება.
მისივე განცხადებით, საქართველოში ვიზიტის პერიოდში გამართული შეხვედრების
მსვლელობისას მრავალჯერ გამოითქვა უკმაყოფილება პროკურატურის ხელმძღვანელობის ხშირ ცვლასთან და ადამიანის უფლებათა დარღვევის ფაქტების არასათანადო გამოძიებასთან დაკავშირებით.
"პროკურორების დანიშვნა, დაწინაურება და კარიერული წინსვლა უნდა განხორციელდეს დამსახურებაზე დაფუძნებული, სამართლიანი და მიუკერძოებელი პროცედურების შესაბამისად, როგორც ეს დადგენილია ევროსაბჭოს მინისტრთა კომიტეტის რეკომენდაციაში სისხლის სამართლის სისტემაში სახელმწიფო ბრალმდებელის როლის თაობაზე" - ნათქვამია ანგარიშში.
კომისარი ნილს მუიჟნეკსი კოლეგებთან ერთად საქმიანი ვიზიტით, საქართველოში 20-25 იანვარში იმყოფებოდა. კომისარმა გამართა შეხვედრები, რომლის დროსაც იმსჯელეს იუსტიციის სისტემაში მართლმსაჯულების აღსრულების, ადამიანის უფლებების დაცვის, ეროვნული უმცირესობების, ტოლერანტობისა და დისკრიმინაციის დაუშვებლობის საკითხებზე.