თბილისის მერობის კანდიდატი ნიკა მელია დღეს, ავტობუსების პარკში იმყოფებოდა, სადაც ავტობუსების მძღოლებს შეხვდა. შეხვედრაზე ნიკა მელიამ ქალაქში მუნიციპალური ავტობუსების განახლების აუცილებლობაზე ისაუბრა.
ახალი ავტობუსები დედაქალაქში მიმდინარე წელს უნდა შემოსულიყო. თბილისის მერიამ ქალაქში 100 ახალი, კომფორტული, ეკოლოგიურად სუფთა და შეზღუდული შესაძლებლობების მქონე პირებზე ადაპტირებული ავტობუსების შესაძენად, ტენდერი 2013 წლის ბოლოს გამოაცხადა. პროექტის განხორციელების შემდეგ, ქალაქში ახალი, ევროპული სტანდარტის, ეკოლოგიურად სუფთა, უსაფრთხო და კომფორტული ავტობუსი შეემატებოდა. თითოეული მათგანი ადაპტირებული იქნებოდა შეზღუდული შესაძლებლობების მქონე პირთათვის და აღჭურვილი იქნებოდა კონდიცირების სისტემით.
აღნიშნული პროექტი ვერ განხორციელდა, რადგან თბილისის საკრებულომ საჭირო თანხა არ გამოყო, შესაბამისად ახალი ავტობუსები თბილისელებს არ ემსახურება.
ნიკა მელიას თქმით, მისი მერად არჩევის შემთხვევაში ავტობუსების ტენდერი თბილისში აუცილებლად გამოცხადდება და ახალი ავტობუსები თბილისელების კომფორტულად გადაადგილებას უახლოეს მომავალში უზრუნველყოფს.
