დღეს, 5 მაისს საქართველოში ევროპის კვირეული იწყება. კონფერენციას ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა ალექსი პეტრიაშვილმა და საქართველოში ევროკავშირის დელეგაციის ხელმძღვანელმა, ელჩი ფილიპ დიმიტროვმა გახსნეს.
კვირეული ნატოსა და ევროკავშირის შესახებ საინფორმაციო ცენტრის ორგანიზებითა და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის მხარდაჭერით იმართება.
ღონისძიების მიზანია ევროკავშირსა და საქართველოს ევროკავშირთან თანამშრომლობის საკითხებზე საზოგადოების ცნობადობის ამაღლება.
ევროპის კვირეული გაიხსნა კონფერენციით "ჩვენი ევროპული არჩევანი", რომელიც ევროკავშირის თემაზე წინასწარ გამოცხადებული ესსეების კონკურსისა და თბილისის სამხატვრო აკადემიაში გამოცხადებული კონკურსის დასკვნით ფაზას წარმოადგენს.
ღონისძიების ფარგლებში მოხდება კონკურსებში გამარჯვებული სტუდენტების დაჯილდოება, რის შემდეგაც ექსპერტებისა და სტუდენტების მონაწილეობით საქართველოს ევროკავშირთან თანამშრომლობისა და ევროკავშირთან ასოცირების შეთანხმების საკითხებზე დისკუსია გაიმართება.
ევროპის კვირეული წარმოადგენს ერთ-ერთ მნიშვნელოვან ღონისძიებას, რომელიც ევროინტეგრაციის საკითხთა კომუნიკაციისა და ინფორმაციის შესახებ საქართველოს მთავრობის სტრატეგიის განხორციელების სამოქმედო გეგმის შემადგენელი ნაწილია.
კვირეული 14 მაისამდე გაგრძელდება. მის ფარგლებში დაგეგმილია შეხვედრები სტუდენტებთან, აკადემიური წრეების წარმომადგენლებთან, ფერმერებთან, პრობაციონერებთან, სპორტული ტურნირები, გამოფენები და სხვა საინტერესო ღონისძიებები როგორც თბილისში, ასევე რეგიოებში.
