დედაქალაქის საკრებულო მერიის მოვალეობის შემსრულებელს სევდია უგრეხელიძეს პროექტის - "თბილისის ადვოკატის" თანხების არამიზნობრივ ხარჯვაში ადანაშაულებს.როგორც საკრებულოს იურიდიულ საკითხთა კომისიის თავმჯდომარემ დავით ჯინჭარაძემ აღნიშნა, მერიის მიერ წარმოდგენილი პროექტი "თბილისის ადვოკატი" საკანონმდებლო ორგანოს 3 მაისის ბიუროს სხდომაზე არ დამტკიცდა.
დავით ჯინჭარაძემ საკრებულოს გადაწყვეტილებასთან დაკავშირებით დეტალურად ისაუბრა და განმარტა, რომ თბილისის მერია ამგვარი უპასუხისმგებლო პროექტების მეშვეობით "თბილისის ადვოკატისთვის" გათვალისწინებული თანხების პარტიული მიზნებისთვის გამოყენებას ცდილობს, რაც ყოვლად მიუღებელია.
მისივე თქმით, დედაქალაქის მერიას დღეს კვლავ უფლებაშეჩერებული მერი, ბრალდებული გიგი უგულავა მართავს და სწორედ მის მსგავსად მოქმედებს ამჟამინდელი მერის მოვალეობის შემსრულებელიც.
ჯინჭარაძის განცხადებით, იმის მიუხედავად, რომ სევდია უგრეხელიძე ოფიციალურად არ არის პროექტის მმართველი, სინამდვილეში სწორედ ის განკარგავს ამ თანხებს, რაც წელიწადში ნახევარ მილიონ ლარს შეადგენს.
საკრებულოს იურიდიული კომისიის თავმჯდომარემ მერიას კონკურსის ჩატარაბისაკენ მოუწოდა და აღნიშნა, რომ აუცილებელია სხვა არასამთავრობო ორგანიზაციებსაც მიეცეთ საშუალება განახორციელონ პროექტი.
საკრებულოს ოქმი და დეტალური ინფორმაცია თბილისის მერიას 5 მაისს გადაეგზავნება.
