არასამთავრობო ორგანიზაცია „ადამიანი, კანონი, თავისუფლებას" მიერ 22 აპრილს დაანონსებული კამპანიის ფარგლებში პირველი გამოხმაურება ლეიბორისტული პარტიის თბილისის მერობის კანდიდატისგან, ქალბატონი ასმათ ტყაბლაძისგან მიიღო. შეხვედრა 1 მაისს გაიმართა. განხილულ იქნა მერობის კანდიდატის პროგრამული პრიორიტეტები, რომლებიც მისი მერად არჩევის შემთხვევაში განხორციელდება.
გამომდინარე იქედან, რომ ორგანიზაცია ბოლო პერიოდში აქტიურად იკვლევს დედაქალაქში არსებულ პრობლემებს, „ადამიანი, კანონი, თავისუფლებას" წარმომადგენლებმა სწორედ იმ პრობლემებზე გაამახვილეს ყურადღება, რომელიც ყველაზე მეტად აწუხებს თბილისის მოსახლეობას. საუბარი შეეხო ეკოლოგიურ, პარკირების, სატრანსპორტო, გზების, ბინათმშენებლობის, ამორტიზებული ლიფტების და მრავალ სხვა პრობლემებს.
მერობის კანდიდატმა დაწვრილებით ისაუბრა პრობლემების გადაჭრის კონკრეტულ გზებზე. მისი განცხადებით, მერად არჩევის შემთხვევაში დიდი ყურადღება მიექცევა ბიუჯეტის მიზნობრივად ხარჯვასა და ტენდერების გამოცხადების პროცესის გამჭვირვალეობას, ასევე ყურადღება გამახვილდება შშმპ და სოციალურად დაუცველთა წინაშე არსებული პრობლემების მოგვარებაზე.
ასმათ ტყაბლაძე მერად არჩევის შემთხვევაში საკრებულოსთან ურთიერთთანამშრომლურ და შეჯერებულ მუშაობას გეგმავს.
„ადამიანი, კანონი, თავისუფლება" აგრძელებს კამპანიას და შეეცდება ყველა კანდიდატის ხედვას და საპროგრამო პრიორიტეტებს გაეცნოს აღნიშნული კამპანიის ფარგლებში, რომელსაც შემდგომ საზოგადოებას ანგარიშის სახით წარუდგენს.
