თბილისის საკრებულოს დელეგაცია სამუშაო ვიზიტით იტალიის რესპუბლიკაში იმყოფებოდა, სადაც შეხვედრები გამართეს იტალიის წამყვანი საინჟინრო-არქიტექტურული კომპანიებისა და ქალაქის დაგეგმარების კორპორაციის ხელმძღვანელებთან. კერძოდ; „ლუკა სკაჩეტის არქიტექტურული სტუდიო", მსხვილ მასშტაბიანი მშენებლობებისა და დიზაინის კომპანია „მარკო პივა"-სა და „ტიციანო კამინიტის" დაგეგმარებისა და მშენებლობის კომპანიასთან.
საკრებულოს ინფორმაციით, შეხვედრაზე მხარეებმა განიხილეს სამომავლო თანამშრომლობის პერსპექტივები ისეთ სფეროებში, როგორიცაა, ქალაქგეგმარება, ინფრასტრუქტურის განვითარება, ქართველი არქიტექტორებისა და დიზაინერების სტაჟირება იტალიის წამყვანი კომპანიების შემოქმედებით სტუდიებში, ერთობლივი პროექტების განხორციელება და სხვა.
ასევე, მაისის თვეში, დაიგეგმა იტალიელი არქიტექტორების ვიზიტი თბილისში, რომლის ფარგლებშიც გაიმართება საქველმოქმედო აქცია გამოფენა-პერფორმანსი.
ცნობილი დიზაინერების მიერ ადგილზე შექმნილი ნამუშევრები შემდგომ გაიყიდება აუქციონის წესით და ღონისძიებიდან შემოსული თანხები მოხმარდება ქართველი დამწყები არქიტექტროების პროექტების ხელშეწყობას.
იტალიის რესპუბლიკაში საქართველოს დელეგაცია წარმოდგენილი იყო შემდეგი შემადგენლობით: თბილისის საკრებულოს ქონების მართვისა და საფინანსო საბიუჯეტო კომისიის თავმჯდომარე ნინო თევდორაძე, საერთაშორისო ურთიერთობების კომისიის თავმჯდომარე კახა გურული და საკრებულოს თავჯდომარის თანაშემწე ზურაბ მჭედლიშვილი.